Британските тајни служби веруваат дека Русија складира проектили за да ги зачува за зимските напади врз Украина. Во петокот, Министерството за одбрана на Велика Британија издаде соопштение во кое се наведува дека руската авијација со долг дострел не извршила напад врз Украина веќе три недели, односно од 21. септември, пишува Newsweek.
Киев продолжува со жестока контраофанзива со цел враќање на окупираните територии, а особено тешки конфликти се водат во регионите Доњецк и Запорожје.
„Иако ваквите прекини не се невообичаени, последните слични паузи од напади се случија меѓу 9. март и 28. април 2023 година и траеја 51 ден“, соопштија британските власти.
Министерството за одбрана на Велика Британија соопшти дека во овој случај најверојатно Русите ги исцрпиле залихите на ракетна муниција AS-23 по зимските операции и обидите за уништување на украинската инфраструктура. Владимир Путин минатата зима ги засили нападите врз критичната украинска инфраструктура, што резултираше со тоа што жителите на Киев, Одеса и западна Украина останаа без електрична енергија.
„Овојпат не е така, веројатно авијацијата со долг дострел ги задржува постојните залихи на ракети и ја користи паузата за зголемување на залихите за претстојните зимски напади на Украина“, соопшти Министерството за одбрана на Велика Британија.
Новите разузнавачки документи укажуваат дека Русија неодамна ги насочила своите воздушни напади врз објекти поврзани со жито во јужна Украина.
„Ова вклучуваше напади врз украинските пристаништа на Дунав за кои беше потребно високо ниво на прецизност бидејќи целите беа лоцирани блиску до романската граница. Веројатно тие користеле еднонасочни беспилотни летала SHAHED поради нивната прецизност во споредба со другите видови ракети лансирани од воздух“, соопшти Министерството за одбрана на Велика Британија.
Пред можниот зимски напад на Русија врз критичната украинска инфраструктура, Олексеј Чернишов, директор на украинскиот државен енергетски гигант „Нафтогас“, кажа дека Киев е поподготвен отколку што беше во 2022 година.
„Очекуваме дека Русија ќе продолжи со ракетни напади и напади со беспилотни летала врз нашите енергетски и инфраструктурни објекти. Нивната задача е да ги лишат Украинците од снабдување со греење, гас и електрична енергија, но тие всушност се насочени кон нивниот морал и емоции. Поподготвени сме, подготвивме одредени заштитни мерки за производство на енергија, дистрибуција и складирање на гас и складирање на нафта“, тврди Олексеј Чернишов.
Тој додаде дека и Русија е подготвена бидејќи и двете страни се попаметни по минатата зима. Тој смета дека ризикот е сепак голем бидејќи Русите ќе подготват пософистицирани напади и методи.