Вучиќ: Сите кои се закануваат со убиство ќе одговараат! Припадникот на Патролата кај кого бил пронајден снајпер е уапсен
Членовите на ултрадесничарската организација Народна патрола, која наводно функционира како своевидна продолжена рака на руската платеничка војска на Вагнер во Србија, протестираа во Белград под прозорците на канцеларијата на Вучиќ на Андриќев венeц, иако главниот собир беше кај споменикот на последниот руски император Николај II, каде што стоеше транспарент „Вучиќу, Шиптару“, што е погрдно име за Албанците.
Тие го обвинија Вучиќ за предавство на Косово, побараа од него да се откаже од германско-францускиот предлог за решавање на косовското прашање бидејќи во спротивно ќе побараат негова оставка и го предупредија да не воведува санкции кон Русија.
Но, се чини дека тоа не беа само инцидентни фолклорни протести на мрзливи ултранационалисти, со кои тој би можел да ги бранува во Брисел како шупливо алиби – „ако ме симнат, видете кој доаѓа“, туку може да биде и предупредувачка порака од Москва. Имено, освен самиот Вучиќ, со Русија се „поврзани“ мнозинството српски радикално-десничарски и конзервативни партии и движења.
Народните патроли предводени од Дамјан Кнежевиќ се многу блиски со руските паравоени групи како што е Вагнер, а познати се и по тоа што ги напаѓаат Русите кои се преселиле во Србија и се противат на војната во Украина и ги напаѓаат српските либерали и демократи. На митингот тие се молеа за „руска победа во Украина“.
Тие се оние кои неодамна во центарот на Белград насликаа голем мурал на Вагнер, потпишувајќи се под него, за да се знае кои се авторите. Во исто време, во српските медиуми, како „Русија Денес Балкан“, која емитува програма од Белград, се појавија видеа и реклами, во кои се повикуваат Србите да му се придружат на Вагнер во војната во Украина, а според некои информации, нивни членови биле и на неодамнешните барикади во северот на Косово меѓу тамошните Срби. Некои медиуми јавуваат дека Вагнерите се „опремиле“ на северот на Косово, каде живее мнозинското српско население.
Но дека тоа не се само празни приказни покажува и изјавата на самиот претседател Александар Вучиќ по повод тие протести – „За да сакаш некој друг, претпоставувам дека е нормално прво да го сакаш својот народ, а не да се фалите со врзувања со некој друг, работејќи против својот народ и држава. Не ми треба некој од Вагнер да ме тапка по рамо и да ми објасни што можам а што не можам да правам“. Вучиќ рече дека „секој што се заканува со убиство ќе одговара“, а членот на Патролата Дејан Бобочек е уапсен и кај него е пронајден снајпер, соопшти новосадската полиција.
Интересно е како истиот ден кога се одржаа „протестите“ во Белград, рускиот прорежимски политиколог и експерт за Балканот, Иван Межухо, за локалната станица 5-тв изјави дека Вучиќ бил под голем притисок од Западот ќе воведе санкции кон Русија и дека „се надева дека нема да ја доживее судбината на Виктор Јанукович“, избеганиот украински претседател.
- Знаеме како заврши се за Јанукович и Украина. Не сакам таква судбина за Вучиќ и Србија – изјави Межухо, кој наведува дека протестите на сите, вклучително и на Вучиќ, им покажале дека „Србите се пријателски расположени кон Русија и Русите“. Рускиот политиколог вели дека ситуацијата во Србија е многу напната, дури и „на работ на војна“ и дека поради притисокот од Западот и општата ситуација во Европа, на „Вучиќ му останува само едно – да маневрира и да балансира“. Межухо му замери на Вучиќ што рекол дека не го признава Крим и новоприпоените области на Украина како руски територии – „можеше да ја игнорира темата и да молчи“ – рече Межухо.
Покрај тоа, рускиот амбасадор во Белград, Александар Боцан-Карченко, кој го нарекуваат „гувернерот на Путин за Балканот“, рече дека германско-францускиот план за Косово не е „основа за долгорочно решение“ и дека „во суштина го претставува меѓународното признавање на независноста на Косово“. Дополнително, Боцан-Харченко за српската агенција Бета изјавил дека нема страв дека Вучиќ „се откажал“ од Русија бидејќи, како што вели, на седницата на Собранието за Косово, „бил дециден и јасен дека го отфрлил германско-француското план“.
- Не знам зошто во некои српски медиуми се нагласува дека претседателот Вучиќ би можел да го прифати тој план кога рече дека е неприфатлив за Белград. Мислам дека нема ни најмала можност Србија да го прифати тој план – посочи Боцан-Харченко и со тоа испрати порака како Москва го сфати „неговиот говор во Собранието за Косово“. Значи, Кремљ кажа што има да каже, а за да го потврди тоа, изгледа испратија ултрарадикали да викаат под прозорецот со руски знамиња, за да биде јасно дека Кремљ има механизми и доволно сопствени луѓе да ја дестабилизираат Србија, односно Вучиќ ако треба.
Конечно, слично сценарио деновиве се спроведува и во Молдавија. Вучиќ си поигра со својата проруска политика и стана нејзин заложник, кој сака да го искористи за „прегазување на Брисел“, кој веќе го губи трпението. Вучиќ на тој начин се соочува со големи предизвици, а сите од Русите и Западот до српската екстремна десница, на која всушност и припаѓа и која ја контролира, му дишат во врат.