Синдикатот ИГ Метал објави дека работниците на Фолксваген утре ќе започнат предупредувачки штрајк низ Германија, што е прв голем прекин на работата од 2018 година.
Почетокот на штрајковите претставува натамошна ескалација на спорот меѓу најголемиот европски производител на автомобили и неговите работници, поради масовни отпуштања, намалувања на платите и можно затворање на погоните, кои се драстични мерки за кои компанијата рече дека не може да ја исклучи можноста да бидат спроведени. поради кинеската конкуренција и намалувањето на побарувачката за автомобили.
Претставниците на работниците во Фолксваген на 22 ноември гласаа за одржување ограничени штрајкови во Германија од почетокот на декември, откако не беше постигнат договор за платите и затворањето на фабриките.
„Доколку е потребно, ова ќе биде најтешката битка за колективно договарање што Фолксваген некогаш ја видел“, рече претставникот на синдикатот ИГ Метал Торстен Грогер во изјавата, пренесе Ројтерс.
Компанијата соопшти дека сè уште е посветена на конструктивен дијалог и изнаоѓање одржливо решение.
„Фолксваген го почитува правото на вработените да учествуваат во предупредувачки штрајк“, рече портпаролот на компанијата како одговор на најавата за штрајк на синдикатот, додавајќи дека компанијата презела чекори за да обезбеди основно ниво на снабдување на клиентите и да го минимизира влијанието на штрајкот. .
Предупредувачките штрајкови во Германија обично траат од неколку часа до еднодневен прекин на работата, според Ројтерс.