Иако топли бранови, зголемување на телесната тежина и ноќно потење се најчесто споменуваните симптоми на менопауза, постојат и други, помалку познати знаци кои можат да го придружуваат овој период. Чешање на кожата, болки во нозете и болки во зглобовите може да бидат резултат на хормонални промени, но тие често остануваат непрепознаени. Експертите истакнуваат дека разбирањето на овие симптоми може да им помогне на жените полесно да управуваат со своето здравје за време на менопаузата.
Чешање на кожата и ушите
Промените во нивото на естроген може да предизвикаат сува кожа и чувство на чешање. „Имаме естрогенски рецептори во нашата кожа, а кога нивото на естроген се намалува, кожата се разредува и се намалува производството на природни масла, што може да доведе до чешање“, објаснува др. Кетлин Џордан за Parad.
Гинекологот Др. Ерика Монтес додава дека, освен на кожата, чешање на ушите може да се појави и поради сувост на слузокожата во ушниот канал. Според гинекологот Др. Амберли Дејвидсон, овој симптом не е многу чест, но може да се подобри со хормонска терапија.
Пецкање и непријатност во стапалата
Некои жени доживуваат печење и непријатност во стапалата за време на менопаузата, што може да биде поврзано со промени во флексибилноста на сврзното ткиво.
„Имавме пациент со необјаснета болка во стапалото, а откако воведовме естроген, симптомите исчезнаа“, истакна гинекологот др. Мајкл Тахири.
Покрај хормоналните промени, зголемувањето на телесната тежина за време на менопаузата може дополнително да ги оптоварува стапалата, предизвикувајќи болка и воспаление.
Болка во зглобовите
Многу жени пријавуваат општа болка во зглобовите и чувство на вкочанетост. „Пациентите ми кажуваат дека целото тело ги боли, иако немаат никаква физичка повреда“, вели др. Тахири. Според др. Дејвидсон, болките во зглобовите сега се повеќе се поврзуваат со менопаузата, феномен наречен „мускулно-скелетен синдром на менопауза“.
Менопаузата носи голем број промени кои можат да влијаат на целокупното здравје, вклучувајќи ги коските, срцето и менталната состојба.
„Многу жени не ги поврзуваат своите симптоми со менопауза, а хормоните играат клучна улога во целото тело“, нагласува др. Монтес. Експертите ги советуваат жените да обрнат внимание на новите или невообичаени симптоми и да разговараат со својот лекар за можни решенија, вклучително и хормонска терапија.