Премиерот на Албанија, Еди Рама, реагираше по изјавата на министерот за одбрана на Србија, Милош Вучевиќ, во врска со Македонија и Црна Гора, оценувајќи при тоа дека – „заканите по стабилноста на двете соседни земји се неприфатливи и многу опасни“, јавија албанските медиуми.
Еди Рама ги нарекува „многу опасни“ и „неприфатливи“ изјавите на Милош Вучевиќ за српските медиуми, за кои рекол дека Македонија и Црна Гора „нема да бидат мирни“ иако се дел од НАТО.
„Заканите против стабилноста и интегритетот на Северна Македонија и Црна Гора се многу опасни и неприфатливи. Да не заборавиме дека Албанија, Северна Македонија и Црна Гора се сојузници на НАТО, целосно посветени на безбедноста и територијалниот интегритет на едни со други“, пишува Еди Рама.
Милош Вучевиќ го изразил своето незадоволство од двете држави поради признавањето на независноста на Косово на што Еди Рама во реакцијата му порачува дека двете земји и Македонија и Црна Гора се дел од НАТО и додава дека иднината на регионот е – „Голема Европа“.
„Во последната деценија во овој регион го постигнавме она што никој не можеше да го замисли со децении претходно и не можеме и нема да дозволиме некој да не влече назад во минатото кое го оставивме зад нас засекогаш! Заедно! Голема Европа е нашата единствена иднина“, напиша Еди Рама.
Во изјава за медиумите, Милош Вучевиќ уште додал дека Македонија и Црна Гора „се мешале во внатрешните работи на Србија“ со признавањето на Косово.
„Направија грешка која повторно ќе ги прогонува, како што ги прогонува сите во случајот со Украина, кои го промовирааа Косово како независна држава. Тие ја отворија Пандорината кутија“, рекол Милош Вучевиќ.