Financial time објави информација според која претставници на администрацијата на Џо Бајден се сретнале со најголемите играчи во глобалната трговија со стоки за да ја договорат трговијата со руската нафта да се задржи на соодветно ниво.
Ова е големо отстапување од претходните ставови на САД, ЕУ или членките на Г-7, според кои е неопходно да се минимизира или целосно да се укине увозот на руска нафта за да се скратат девизните приходи на Кремљ колку што можно и со тоа да ја дестабилизира руската економија, а можеби дури и да го соборат режимот на Владимир Путин. Меѓутоа, сега во разговорите за руската нафта веќе не се споменуваат термини како „ембарго“, што е поврзано со целосно прекинување на трговијата туку токму спротивното.
Претставници на Министерството за финансии на САД, како што пишува FT, меѓу другото се сретнале и со менаџерите на Trafigure и Gunvor, најголемите компании во светската трговија со стоки, вклучително и нафта. Пораката на преставниците од САД до менаџерите е слободно да ја прошират својата улога во руската трговија со нафта. Единственото важно ограничување што американската администрација би го задржала е договорената граница на цената на руската нафта.
„Американците активно не охрабруваа повторно да учествуваме во транспортот на нафта“, изјавил за FT еден од учесниците на состанокот.
„Останува на поединечни компании да донесат свои одлуки. Нашата цел е да ја пренесеме дозволената архитектура на ценовното ограничување“, кажал еден од претставниците на Министерството за финансии на САД и објаснил дека на средбата со менаџерите на компаниите бил фокусот структурата на пазарот.
Некои од глобалните трговци со нафта, како Trafigure, Vitol и Gunvor доброволно и драстично го намалија својот бизнис со руската нафта бидејќи се плашеа од реакциите на јавноста доколку продолжат да испорачуваат милиони барели дневно. Сега САД ги уверува дека нема од што да се плашат.
Без оглед на тоа што големите играчи се воздржуваа од тргување со руска нафта, таа сепак го најде патот до клиентите преку помалите трговци, кои главно ги снабдуваа азиските пазари. Ова предизвика загриженост за животната средина бидејќи старите танкери се користеа без западно осигурување и други придружни услуги за превоз.
Очигледно клучна причина за реакцијата на американските власти е стравот од посериозен прекин на снабдувањето. Претходните предупредувања на оние кои тврдеа дека целосното ембарго на нафтата, вклучително и ограничувањето на цената, може сериозно да и наштети на западната алијанса и на либералните демократии, а особено на Европската унија, доколку дојде до прекин на испораките, добиваат на тежина. Исто така, треба да се земе предвид дека одржувањето на стабилни испораки овозможува одржување на релативно стабилни, прифатливи цени. Обновената верба во пазарната законитост во однос на забраните ја потврдуваат и претставниците на Министерството за финансии на САД: „Една од нашите цели е нафтата да остане на пазарот… Охрабрени сме затоа што пазарот на нафта остана стабилен во последните неколку месеци. иако рускиот приход е намален за 60 отсто од почетокот на инвазијата“, изјавил друг функционер од САД за весникот.
Разговорите меѓу американската администрација и трговците со нафта се одржаа во Хјустон за време на конференцијата CERAWeek.
Повеќето членки на Г-7 и ЕУ го забранија увозот на руска нафта во странство, но извозот во други земји сè уште е дозволен. Индија, Кина и Турција значително го зголемија увозот на руска нафта.
„Американците навистина сакаат нафтата да се движи“, кажал еден од трговците на состаноците, мислејќи на руската нафта.
Русија се закани дека ќе го прекине снабдувањето со нафта откако западните земји ја зголемија воената помош за Украина.