Во Вашингтон, со децении постои теоријата „Пентагонска пица“, која вели дека активностите во пицериите и другите ресторани во близина на седиштето на Министерството за одбрана на САД можат да „предвидат“ некој значаен настан во светот.
Имено, теоријата диктира дека натпросечната активност во доцните ноќни ресторани околу Пентагон би можела да послужи како знак дека во оваа зграда се подготвува „нешто големо“.
Оваа теорија постои со децении, но неодамна стана популарна на социјалните мрежи.
Теоријата стана толку популарна што постои високо следен профил на X Network (порано Твитер) наречен „Pentagon Pizza Report“, кој објавува новости за активностите во рестораните во близина на седиштето на Министерството за одбрана на САД.
„Пентагон Пица Рипорт“ објави вечерта на 12 јуни дека „скоро сите пицерии во близина на Пентагон забележале огромно зголемување на активноста“ околу 19 часот по локално време. Во овој период, Израел започна напад врз Иран.
Потеклото на оваа теорија датира од ерата на Студената војна, кога советските разузнавачки служби следеле невообичаено голем број испораки на пица за да ја проценат подготвеноста за можни кризи.
Потоа, на 1 август 1990 година, Френк Микс, сопственик на ресторан „Доминос“ во Вашингтон, забележал ненадејно зголемување на испораките до зградите на ЦИА, непосредно пред инвазијата на Кувајт од страна на Ирак, што ја предизвикало Заливската војна.
Она што тој го сметал за случајност во тоа време, со текот на годините, станало шема.
Микс за „Лос Анџелес Тајмс“ изјави дека сличен пораст на нарачките за пица се случил во декември 1998 година, за време на процесот на импичмент против поранешниот претседател Бил Клинтон.
Сепак, претставници на Министерството за одбрана ја отфрлаат оваа теорија со години, велејќи дека нивните вработени имаат „многу опции“ во самата зграда.
Портпарол на Пентагон изјави за „Њузвик“ дека „во зградата има многу опции за пица“, додавајќи дека вработените можат да нарачаат и суши, сендвичи, крофни и кафе во седиштето на Министерството за одбрана.