Продолжуваат судирите меѓу албанските партии околу дивоградбите во Чаир и Сарај. Коалицијата ВЛЕН ја повикува градоначалничката на Градот Скопјe, Данела Арсовска, да не го штеди, како што велат, својот бизнис партнер од редовите на ДУИ и да излезе на терен за да ги види сите дивоградби во Сарај. Доколку продолжи молчењето на Арсовска и одговорните институции, оваа коалиција предупредува на мерки.
„Госпоѓо Арсовска, предметната зграда е изградена во Сарај, кој е сопственик на истата зграда, на кое земјиште е изградена зградата, дали оваа зграда му припаѓа на вашиот деловен партнер и е формално регистрирана како сопственост на некој друг… објавување на сите локации во Скопје каде што компании и луѓе од кланот ДУИ градат и граделе и поседуваат згради без дозвола? Доколку градоначалникот и одговорните институции продолжат да молчат, ќе ги искористиме сите законски и демократски механизми за заштита на интересите на граѓаните“, изјави Мухамед Елмази, ВЛЕН.
Демократската унија за интеграција продолжува да се фокусира на општина Чаир.
„Во општина Чаир, изградбата на над 150 згради без дозволи, без статички и сеизмички стандарди и без никаква институционална контрола, претставува не само урбанистички криминал и сериозна опасност за граѓаните, туку и средство за политички притисок врз лидерите на овие партии претпочитани од Мицкоски, кои веќе станаа послушни алатки на антиевропската и антиалбанската агенда на Владата“, велат од ДУИ.
На судирите меѓу партиите им претходеа обвинувања и контраобвинувања меѓу градоначалничката на Градот Скопјe, Данела Арсовска, и градоначалникот на општина Чаир, Висар Ганиу. Арсовска неодамна излезе со обвинувања дека во Чаир со години се одвива нелегална градба. Првиот човек на општина Чаир, Висар Ганиу, ги отфрли овие обвинувања и подне тужба за клевета против Арсовска.