Претседателот на Република Српска, Милорад Додик, ја плати сумата пари за замена на едногодишната затворска казна што ја доби по правосилна судска одлука за непочитување на одлуките на високиот претставник.
„Одлучувајќи по барањето на одбраната на осудениот Милорад Додик за замена на затворската казна со парична казна, Судот, во согласност со законските одредби, одлучи, по изјавата на Обвинителството на Босна и Херцеговина, да го одобри предлогот на одбраната, а затворската казна изречена на Милорад Додик е заменета со парична казна“, соопшти Судот на Босна и Херцеговина.
Додик платил 36.500 конвертибилни марки (18.662 евра), или 100 КМ (51 евро) за секој од 365-те дена што требало да ги помине зад решетки.
Исто така, вреди да се напомене дека во Босна и Херцеговина е можно да се „купи“ затворска казна до една година.
Покрај затворската казна, на Додик му е забрането и политичко дејствување во период од шест години.
Поради оваа судска одлука, Централната изборна комисија на Босна и Херцеговина (ЦИК) му го одзеде мандатот како претседател на Република Српска.
Одлуката на ЦИК денес ја прифати неговиот адвокат, Горан Бубиќ, кој исто така поднесе жалба. Се очекува одлуката на Советот за жалби да биде донесена следната недела.