Демократската унија за интеграција реагираше на изјавите на премиерот на земјата, Хрстијан Мицкоски.
Од ДУИ велат дека премиерот продолжува да ги дели Албанците на добри и лоши, но според нив, ваквите изјави само повеќе ги обединуваат Албанците.
Целосна реакција:
„Мицкоски продолжува да ги дели Албанците на „добри“ и „лоши“, оваа реторика ја обединува албанската политичка сцена против него. Премиерот Мицкоски, во својот последен јавен настап, повторно се вклучи во опасна реторика на поделба и дискриминација, овој пат насочена кон Албанците. Наместо да се фокусира на реформите што ги вети, на приближувањето кон ЕУ, економската стабилност и почитувањето на етничката рамнотежа, Мицкоски продолжува со националистичка агенда која има за цел да создаде покорни, послушни, тивки и декоративни Албанци. ДУИ јавно предупредува дека оваа реторика не само што е опасна, туку веќе произведува спротивен ефект: ги обединува дури и најголемите политички противници околу заедничка цел, заштита на достоинството, политичката автономија и иднината на албанската заедница во државата“, велат, меѓу другото, од ДУИ.