Војната на Израел против Хамас во Појасот Газа ќе трае „повеќе од неколку месеци“, им порача министерот за одбрана, Јоав Галант, на високите американски претставници во Тел Авива во четврток.
„Тие изградија подземна и надземна инфраструктура и не е лесно да се уништи“, рекол Јоав Галант за време на разговорот со советникот за национална безбедност на САД, Џејк Саливан.
„Ќе биде потребно време – ќе потрае повеќе од неколку месеци, но ние ќе победиме“, нагласил Јоав Галант.
Тој им се заблагодари на САД за нивната континуирана помош за Израел и нивните напори да ги ослободи заложниците киднапирани од Хамас во нападот врз Израел на 7. октомври. По состанокот, Џејк Саливан се сретна и со премиерот на Израел, Бенјамин Нетанјаху и со други членови на воениот кабинет.
„САД разговараа со израелското раководство за можна транзиција кон воени операции со помал интензитет во Појасот Газа“, соопшти Белата куќа.
Директорот за комуникации на Советот за национална безбедност на САД, Џон Кирби, вели дека Џејк Саливан разговарал за можната транзиција, како што вели, „од она што ние би го нарекле операции со висок интензитет, што е она што сега ги гледаме како го прават, за операции со помал интензитет“.
„Но, не сакам да ставам временски печат на тоа“, вели тој.
Џон Кирби не кажа како би можела да изгледа таа операција. Претседателот на САД, Џо Бајден, вели дека сака Израел да се фокусира на тоа како да спаси цивилни животи во Појасот Газа.
„Сакам да бидат фокусирани на тоа како да спасат цивилни животи, да не ги запираат нападите против Хамас, туку да бидат повнимателни“, вели Џо Бајден.
На прашањето за времетраењето на војната, Џон Кирби вели дека САД не им диктираат на Израелците колку долго треба да трае војната. Израел продолжи да го гаѓа Појасот Газа во четвртокот и покрај интензивните меѓународни повици за заштита на цивилите и ширењето на смртоносните болести меѓу раселените жители.
Според здравствените власти во Појасот Газа, израелската Армија во нападите убила најмалку 18.600 луѓе, а ранила 50.000. Истражувањето на јавното мислење во Израел покажа дека граѓаните не сакаат Армијата да ја прекине офанзивата за да го уништи Хамас и покрај повикот на Генералното собрание на ОН за прекин на огнот, зголемениот список на воени жртви и зголемениот број на палестински жртви во Појасот Газа.