Европската централна банка (ЕЦБ) се подготвува за уште едно намалување на каматните стапки, но царините на американскиот претседател Доналд Трамп ја зголемуваат неизвесноста околу инфлацијата во еврозоната и поделбите меѓу членовите на одборот на банката околу понатамошната монетарна политика.
Според анализата на „Блумберг“, моменталната слика за инфлацијата во еврозоната изгледа поволна. Цените на енергијата паднаа, а еврото зајакна по воведувањето на таканаречените „реципрочни тарифи“ од страна на американскиот претседател Доналд Трамп во април.
И покрај ова, следниот бран царини, кој во јули би можел да ги зголеми американските давачки за стоки од ЕУ од 10 проценти на дури 50 проценти, внесува дополнителна неизвесност во понатамошниот развој на инфлацијата.
Клучен предизвик за ЕЦБ ќе биде балансирањето помеѓу поддршката на слабиот раст, а воедно и избегнувањето на прекумерното монетарно олабавување што би можело да предизвика нов инфлациски притисок, додаде агенцијата со седиште во Њујорк.
Пазарите генерално очекуваат депозитната каматна стапка да се намали за 25 базични поени на два проценти во четврток, но понатамошно намалување на стапката во септември на 1,75 проценти е неизвесно.
Белгискиот гувернер Пјер Вуш е за понатамошно намалување на каматните стапки, додека германските претставници, вклучувајќи го и шефот на Бундесбанк, Јоаким Нагел, и членката на Извршниот одбор на ЕЦБ, Изабел Шнабел, се многу повнимателни.
Монетарната политика на Европската централна банка веќе дава резултати и нема потреба од дополнителни големи стимулации, според Холгер Шмидинг, главен економист на Беренберг банка во Хамбург.
Европската централна банка веројатно нема да даде цврсти ветувања за каматните стапки, но се очекува претседателката на ЕЦБ, Кристин Лагард, да повтори дека идните одлуки ќе зависат од развојот на клучните индикатори – вклучувајќи ја фискалната политика, геополитичките тензии и условите на пазарот на трудот.