Некои овошја, иако не се секојдневен гостин во нашите кошнички, можат да имаат исклучително позитивно влијание врз здравјето. Експертите често ја нагласуваат важноста од разгледување на разновидноста во нашата исхрана и давање шанса на поегзотични видови овошје кои се лесно достапни во текот на целата година.
Едно такво овошје е мангото, тропско овошје кое во некои делови од светот се нарекува „крал на овошјето“. Мангото е богато со вредни хранливи материи, а разни студии го поврзуваат со подобар имунитет и варење, па дури и со помал ризик од одредени видови рак благодарение на полифенолите што ги содржи, пишува Дејли експрес.
Според експертите, една шолја манго може да задоволи дури 67 проценти од вашите дневни потреби за витамин Ц и десет проценти од вашите потреби за витамин А, кои се важни за имунитетот и здравјето на кожата.
Мангото содржи и антиоксиданси како што се бета-каротен, лутеин и зеаксантин, кои, според студиите, помагаат за здравјето на очите и ја зајакнуваат одбраната на телото.
Мангото лесно може да се вклучи во секојдневната исхрана – или како ужина или како додаток во смути. Освен што придонесува за здравјето, експертите нагласуваат дека мангото може да биде одличен избор за оние кои бараат здрава и вкусна алтернатива на класичните слатки.