СМЕАТА би можела да биде најдобриот лек кога се работи за срцеви заболувања, сугерира новото истражување. Редовното смеење може да ги подобри симптомите на срцеви заболувања и потенцијално да го намали ризикот од срцев удар и мозочен удар.
Научниците во Бразил откриле дека пациентите со срцеви заболувања кои се смееле додека гледале ситкоми двапати неделно доживеале намалување на воспалението и зголемување на капацитетот на срцето да пумпа кислород, пишува The Telegraph.
Најновото истражување беше претставено во текот на викендот на конгресот на Европското здружение за кардиологија во Амстердам. Во него беа вклучени 26 возрасни со просечна возраст од 64 години, на кои им беше дијагностицирана коронарна артериска болест. Тоа е состојба предизвикана од акумулација на наслаги во ѕидовите на артериите кои го снабдуваат срцето со крв.
Дел од испитаниците гледале хумористични серии, другиот дел сериозни документарци
Во период од три месеци, на половина од пациентите им било побарано да гледаат хумористични серии во траење од два часа секоја недела. Другата половина гледаше два сериозни документарни филмови секоја недела. На крајот на периодот од 12 недели, првата група забележала 10 проценти подобрување на тестот кој мери колку кислород срцето може да пумпа низ телото. Тие, исто така, покажаа подобрувања во тестовите кои мерат колку добро може да се шират артериите.
Тестовите на крвта откриле дека тие имале значително намалување на воспалителните биомаркери, кои покажуваат колку наслаги се насобрале во крвните садови и дали луѓето се изложени на ризик од срцев или мозочен удар.
„Нашата студија откри дека терапијата со смеа го зголемува функционалниот капацитет на кардиоваскуларниот систем. Тоа е добра интервенција која може да помогне да се намали тоа воспаление и да се намали ризикот од срцев и мозочен удар. Смеењето му помага на срцето затоа што ослободува ендорфини кои го намалуваат воспалението и помагаат да се релаксираат срцето и крвните садови. Исто така, го намалува нивото на хормоните на стрес кои го оптоваруваат срцето“, коментира водечкиот автор на студијата, професор Марко Сафи.
Претходните студии покажаа дека смеењето го стимулира производството на таканаречените хормони на среќата, односно ендорфин, допамин и серотонин. Исто така, може да го зајакне имунитетот и природните одбранбени системи на телото.