Портпаролот на рускиот претседател Владимир Путин, Дмитриј Песков, ги коментираше медиумските извештаи во врска со мировниот план за Украина предложен од турскиот претседател Реџеп Таип Ердоган.
Портпаролот на Кремљ рече дека овие предлози се неприфатливи за Русија.
– Идејата за замрзнување на конфликтот по линијата на фронтот е трајно неприфатлива за руската страна – рече Песков.
Тој беше прашан дали Путин и Ердоган разговарале за такви планови.
– Не, тие не разговараа за тоа. Ги забележавме тие натписи, но во моментов немаме информации за нив и не знаеме на што би можеле да се однесуваат – рече Песков.
Блумберг објави дека Ердоган планира да претстави мировен план за ставање крај на руско-украинската војна на самитот Г20, кој започнува денеска во Рио де Жанеиро, а домаќин е бразилскиот претседател Луис Инасио Лула да Силва.
Се вели дека планот на Ердоган вклучува замрзнување на сегашната состојба на конфликтот на фронтот и одложување на разговорите за членството на Украина во НАТО за најмалку десет години, што би било отстапка за Путин.