Околу 20.000 луѓе ќе бидат опфатени со новиот закон за сезонско вработување. Пратеникот на ВМРО-ДПМНЕ, Бојан Стојановски, вели дека се очекува законот да реши голем дел од сивата економија. Стојановски вели дека законот ќе им користи и на работниците и на работодавачите, како и на државата преку наплатата на придонесите и даноците.
„Нашите пресметки и претпоставки се дека приближно 20 илјади луѓе ќе потпаднат под тој регулаторен систем и ова би им користело и на работодавачите, на работниците и на државата преку наплатата на даноците. Ова е важно затоа што со помош на овие луѓе кои се денес со нас, решаваме проблем кој е присутен во македонското општество веќе 34 години и едноставно ќе продолжиме тесно да соработуваме со нив за да решиме други суштински проблеми кои се важни за граѓаните“, изјави Бојан Стојановски – пратеник на ВМРО-ДПМНЕ.
Давид Оберхубер од Германското здружение за меѓународна соработка, кое донира средства за развој на системот за регистрација на сезонски работници, вели дека овој закон би можел значително да ја намали неформалната работа и да ги зголеми државните приходи.
„Оваа реформа им служи на сите. Работниците добиваат права и заштита, работодавачите имаат корист од полесен и законски начин за исполнување на работните барања, а државата гледа зголемување на јавните приходи. Сето ова преку поедноставен и потранспарентен процес“, рече Давид Оберхубер – Германско друштво за меѓународна соработка.
Марија Ристеска од Центарот за истражување и креирање политики вели дека со овој закон, работодавачите ќе можат да ги регистрираат работниците насекаде со лесна за користење апликација.
„Ќе имаме лесна за користење онлајн апликација за регистрација и одјавување од терен, од вашиот дом, од вашето работно место, кафе на плажа, скијачко училиште и така натаму, така што се надеваме дека ќе ја обезбедиме потребната флексибилност за регистрација и одјавување од привремена и сезонска работа“, нагласи Марија Ристеска – Центар за истражување и креирање политики.
Законот ќе стапи на сила на 1 јануари 2026 година и ќе им овозможи на сите вработени или невработени лица, студенти и пензионери да работат сезонски работи без да ги изгубат своите приходи.