Џозеф Авуа-Дарко, 28-годишен британско-гански уметник, раскажува една од најтажните приказни на нашето време. По години борба со биполарно растројство, тој решил да си го одземе животот преку легална еутаназија во Холандија. Додека чека на одобрување, што може да трае и до четири години, тој го започнал проектот „Тајна вечера“, за време на кој вечера со странци низ цела Европа, споделувајќи приказни, емоции и моменти на поврзување.
Патот до одлуката
Џозеф ја објави својата одлука во декември 2024 година преку емотивно видео на Инстаграм:
„Здраво, јас сум Џозеф, имам биполарно растројство и се преселив во Холандија за законски да си го завршам животот.“
Соопштението предизвика лавина од реакции – од поддршка и сочувство до критики и повици до него да ја преиспита својата одлука. Сепак, најнеочекуваниот одговор дојде во форма на над 100 покани за вечера од целосно непознати. Инспириран од овие гестови, Џозеф ја започна „Тајната вечера“, проект во кој патува и вечера со луѓето што го поканиле, споделувајќи приказни и создавајќи длабоки човечки врски.
Вечери што лекуваат
Досега, Џозеф организирал над 70 вечери во градови како Париз, Милано, Брисел и Берлин. Овие вечери не се само оброци, туку и можности за искрени разговори за менталното здравје, животните предизвици и човечката поврзаност. Многу од домаќините и самите поминале низ слични борби, а некои дури и ја испланирале својата еутаназија.
Една од најемотивните вечери беше со Емануел, 25-годишен маж кој доби одобрение за евтаназија и планира да си го одземе животот во белгиска шума. Џозеф напиша:
„Денес е прв (и можеби последен) пат мојот драг пријател Емануел да готви за мене додека се подготвува за неговата медицински асистирана смрт на 30 јули. Беше прекрасно да се види како напредува во кујната, бидејќи готвењето го гледа како јазик на љубовта. Мило ми е што сум покрај него во ова уникатно интензивно поглавје од неговиот живот.“
Наследство преку уметност и поврзување
Покрај вечерите, Џозеф планира да објави книга со наслов „Драги уметници“ на пролет 2025 година, а сите приходи ќе одат во добротворни организации за ментално здравје. Тој исто така планира да ја продаде целата своја колекција современа уметност, сакајќи да остави зад себе наследство кое промовира емпатија, разбирање и отворен разговор за менталното здравје.
Јавни реакции
Приказната на Џозеф предизвика глобална дебата за еутаназијата, менталното здравје и правото на достоинствен крај на животот. Додека многумина изразија поддршка и восхит за неговата храброст, други изразија загриженост дека таквото јавно документирање би можело да го романтизира самоубиството и негативно да влијае врз ранливите поединци. Џозеф, сепак, истакнува дека неговата цел не е да ја промовира смртта, туку да создаде простор за искрена дискусија и поврзување со луѓето.