Украинскиот претседател Володимир Зеленски денес изјави дека потпишал нов пакет санкции, предложен од Народната банка на Украина, насочени кон борба против руските финансиски шеми, вклучително и оние поврзани со криптовалутите.
Во видео обраќање, Зеленски нагласи дека овој пакет санкции претставува синхронизација со меѓународните партнери, како и иницијатива на Украина, пренесува Укринформ.
„Само преку една компанија, која сега е на списокот со санкции, и само од почетокот на оваа година, односно пред санкциите, Русите потрошија неколку милијарди долари, главно за потребите на нивната воена индустрија. Секако, ние ќе ги запреме сите тие шеми“, рече Зеленски.
Тој додаде дека сега, кога вообичаените финансиски канали за Русија се блокирани на многу места, Русија се префрла на плаќања со криптовалути.
„Денешниот пакет вклучува санкции против 60 правни лица, а за секој од нив ќе работиме со нашите партнери за да ги комбинираме санкциите – нашите и европските, нашите и другите значајни јурисдикции низ целиот свет“, прецизираше тој.
Пакетот украински санкции ќе опфати 73 лица, сите руски државјани. Зеленски додаде дека правилата за санкции се разликуваат низ целиот свет, но дека сите тие имаат заедничка цел – „да ја принудат Русија да ја заврши војната и да го ограничи својот потенцијал колку што е можно повеќе“.
На Министерството за надворешни работи на Украина му е наложено да ги информира надлежните органи на Европската Унија, Соединетите Американски Држави и другите земји за примената на санкциите и да го покрене со нив прашањето за воведување слични рестриктивни мерки.