Илон Маск објави дека социјалната мрежа Твитер привремено го ограничува бројот на твитови (објави) што луѓето можат да ги читаат во еден ден, бидејќи илјадници корисници пријавиле проблеми при пристапот до страницата.
Илон Маск, кој го презеде Твитер во октомври откако го купи за 44 милијарди долари, во саботата објави дека проверените сметки ќе бидат ограничени на читање 6.000 објави дневно.
„Непроверените сметки можат да читаат само 600 објави дневно, а новите непроверени сметки се ограничени на само 300 дневно“, најави тој.
Во подоцнежниот твит (објава), милијардерот додаде: „Границите наскоро ќе се зголемат на 8000 за потврдени, 800 за непроверени и 400 за нови непроверени“.
Извршниот директор на Tesla и SpaceX вели дека Твитер наметнал „привремено ограничување“ за „да се справи со екстремните нивоа на екстракција на податоци и манипулација со системот“.
Илон Маск не кажа кога точно ќе се зголемат ограничувањата или колку долго ќе важат ограничувањата.
Во Велика Британија, 5.126 луѓе се пожалија на проблеми со пристапот до страницата во 16:12 часот во саботата, откако извештаите за прекини почнаа да доаѓаат во 12 часот, според веб-страницата Downdetector – која ги следи прекините на Интернет.
Во САД, околу 7.461 лице се пожалиле на проблемите до 16:15 часот по британско време, се вели на страницата.
Хаштаговите #Twitterdown и #RIP на Твитер беа во тренд бидејќи фрустрираните корисници се соочија со порака која гласеше: „Ограничувањето е надминато. Ве молиме почекајте неколку моменти и потоа обидете се повторно“.
Во петокот, на луѓето кои се обидуваа да пристапат до Твитер им беше кажано дека ќе мора да се логираат на сметката за да ги видат објавите, што Илон Маск го нарече „привремена итна мерка“.