Американскиот претседател Доналд Трамп објави дека пронашол купувач за апликацијата TikTok во таа земја.
Во интервју за „Фокс њуз“, Трамп рече дека пронашол група „многу богати луѓе“ како потенцијален купувач за „ТикТок“, чиј идентитет ќе го открие за околу две недели, објави АП.
Тој рече дека група богати инвеститори ќе понудат да го купат TikTok.
„Инаку, имаме купувач за TikTok. Мислам дека веројатно ќе ми треба одобрение од Кина и мислам дека (кинескиот) претседател Си (Џинпинг) веројатно ќе го стори тоа“, рече Трамп.
Американскиот претседател не понуди никакви детали за инвеститорите, нарекувајќи ги „група многу богати луѓе“.
„Ќе ви кажам за околу две недели“, рече Трамп, кога беше прашан за детали.
На 18 јуни, Трамп ја одложи забраната за апликацијата TikTok во Соединетите Држави по трет пат, освен ако нејзиниот сопственик, кинеската компанија ByteDance, не ја продаде социјалната мрежа.