Голманот на Париз Сен Жермен, Серхио Рико (30 г.), откри дека изгубил 20 килограми по неговата речиси фатална несреќа во мај, за време на интервју за El Partidazo de COPE.
Шпанскиот чувар на мрежата беше оставен во кома неколку недели по повредата на главата што ја доби откако падна од коњ додека бил на одмор во Севиља. Според лекарскиот извештај, Серхио Рико бил на половина сантиметар од смртта, но сега се надева дека ќе застане на голот на ПСЖ до крајот на оваа сезона.
„Мојата крајна цел е да бидам со тимот пред крајот на сезоната“, изјави Шпанецот за медиумските канали на ПСЖ уште во септември.
Серхио Рико се врати во „Паркот на Принцовите“ на крајот на ноември, кога брзо го започна процесот на опоравување. Дел од тоа закрепнување вклучуваше враќање на тежината што ја изгуби додека беше во кома.
„Секој ден станувам малку подобар, но медицински се уште не сум на 100% спремен“, рекол тој во едно интервју, а пренесува Le Parisien.
„Останувам во Севиља за да не морам да одам со авион секогаш кога ќе морам овде да правам тестови. По несреќата ослабев скоро 20 килограми. Имав околу 91-92 кг. Бев до 73, но сега се вратив на 88 килограми. Ги видов фотографиите кога излегов од болница. Изгледав како чепкалка за заби!“, открива Серхио Рико.
Не е јасно дали и кога Серхио Рико повторно ќе може да игра фудбал, но шпанскиот голман разбирливо е желен да се врати.
„Постојано му пишувам на мојот доктор за да дознаам кога повторно ќе ми дозволи да спортувам. Едвај чекам да се вратам на мојата рутина, да се чувствувам како фудбалер. Но, тоа не е во мои раце. Ги почитувам упатствата на лекарите кои ме чуваа и кои ми го спасија животот“, изјави Серхио Рико.