Во петокот, украинските власти известија за ослободување на селото Старомајорска на југот од регионот Доњецк.
„Нашиот југ! Нашите момчиња! Слава на Украина!“, напиша претседателот на Украина, Володимир Зеленски, во објава на социјалната мрежа Телеграм. Властите во Киев тврдат дека напреднале и јужно од Бахмут. Во фокусот на борбите се селата Клишчивка, Курдуумивка и Андривка, пишува германскиот весник Spiegel.
New York Times беше првиот медиум што пишуваше за смената на бојното поле. „По првата фаза обележана со бавен напредок и големи загуби, Украинците се прегрупираа за да започнат втор, помоќен напад. Целта на новата контраофанзива е пробив во Запорожје. Ова е голем тест“, изјавил неименуван американски функционер за NYT. Очекувањата од летната контраофанзива растат. Минатиот месец донекаде имаа контраефект, кога беше откриено колку добро навлегле Русите. Сега, по неколкунеделни артилериски напади со долг дострел, Украинците напаѓаат со обновена енергија.
Според Институтот за проучување на војната (ISW) со седиште во Вашингтон, се чини дека украинските сили ги нарушиле руските одбранбени позиции во близина на градот Орихив. Тие успеале да се пробијат и низ тактички предизвикувачките одбранбени позиции кај селото Роботин. Двете села се на пат кон Азовското Море. Снимките од воздух покажуваат интензивни борби околу Бахмут. На самитот со африканските лидери во Санкт Петербург, Владимир Путин самиот потврди дека конфликтите значително се интензивирале.
Втората рунда од контраофанзивата може да се покаже како поуспешна од првата. Но, тоа не значи дека17-месечната војна наскоро ќе заврши. Некои аналитичари сметаат дека директна воена победа за Украина е невозможна, пишува Yahoo News. Продолжувањето на војната, тврдат тие, само ќе предизвика повеќе смртни случаи и повеќе страдања.
„САД и нивните сојузници треба да се обидат да го насочат конфликтот кон крајот на играта“, рекол аналитичарот Семјуел Чарап од корпорацијата RAND.
„Премногу е рано за дипломатија, особено додека украинските сили напредуваат“, изјавил портпаролот на Советот за национална безбедност на САД, Џон Кирби и додал: „Володимир Зеленски може да одреди дали и кога е подготвен да седне и да преговара“.
„Украина е нападната, на нејзино тло се уште има десетици илјади руски војници. И таа има целосно право да сака да го врати територијалниот интегритет и суверенитет на својата земја“, вели Џон Кирби.
Аналитичарите Џорџ Биби и Џејмс Веб, поранешен директор на секторот за аналитика во одделот за Русија на ЦИА и поранешен маринец, пишуваат за магазинот Time дека Украина, и покрај интензивното регрутирање, има премалку војници: за успешна офанзива, напаѓачот мора да има три пати повеќе. Украина е исправена пред избор: или ќе ја продолжи офанзивата со недоволен број војници и оружје напаѓајќи ги добро утврдените Руси, или ќе се префрли на одбранбена тактика.
Ако тргне во офанзива, може да ги исцрпи ресурсите и да се остави опасно ранлива на руски контранапад. Така, во 1943 година, битката кај Курск го исцрпи Вермахтот и им овозможи на Советите да извршат контранапад, кој не запре додека Црвената Армија не стигна до Берлин.
Доколку ја нагласат одбраната, скратувањето и зајакнувањето на одбранбените линии, би можеле да се задржат на областите на Донбас кои Русија официјално ги анектираше, но допрва треба да ги освои, ставајќи го Киев во посилна преговарачка позиција отколку со неуспешна контраофанзива, според Time. Со дипломатски притисок, ова може да ја принуди Русија на преговарачка маса.