Резултатите од клиничкото испитување покажаа дека земањето на лекот резултирало со 51 отсто намалување на ризикот од смрт кај лекуваните пациенти, во споредба со плацебо. Лекот е веќе одобрен во десетици земји.
Лекот „осимертиниб“ го преполовува ризикот од смрт од најчестиот тип на рак на белите дробови доколку се зема секој ден по операцијата за отстранување на тумор, според резултатите од клиничкото испитување презентирано неодамна.
Резултатите беа објавени во Чикаго на најголемата годишна конференција на специјалисти за рак, чиј домаќин е Американското здружение за клиничка онкологија (ASCO).
Ракот на белите дробови е најсмртоносната форма на болеста, со приближно 1,8 милиони смртни случаи ширум светот секоја година. Лекот кој го разви фармацевтската групација АстраЗенека „осимертиниб“ се продава под името „Тагрисо“.
Делува кај ракот на белите дробови кај пациентите кои боледуваат од таканаречен не-ситноклеточен карцином , најчест тип кој покажува одреден вид мутација. Тие мутации, на таканаречениот рецептор на епидермалниот фактор на раст или ЕГФР, погодуваат 10 до 25 отсто пациенти со рак на белите дробови во САД и Европа и 30 до 40 отсто во Азија.
Клиничкото испитување опфати 680 учесници во раната фаза на болеста (фази од 1б до 3а), во повеќе од 20 земји. Прво морале да бидат оперирани за да се отстрани туморот, потоа половина од пациентите земале дневен лек, а другите плацебо. Резултатот покажа дека земањето апчиња резултирало со 51 отсто намалување на ризикот од смрт кај лекуваните пациенти, во споредба со плацебо. По пет години, 88 отсто од пациентите кои ја земале терапијата биле сè уште живи, во споредба со 78 отсто од пациентите кои земале плацебо.
Овие податоци се „импресивни“, рече Рој Хербст од Универзитетот Јеил, кој ги презентираше во Чикаго. Лекот помага „да се спречи ширењето на ракот на мозокот, црниот дроб, коските“, додаде тој на прес-конференцијата. Околу една третина од не-ситноклеточните карциноми може да се оперираат кога ќе се открие, рече тој.
„Мислам дека е тешко да се пренесе колку е важно ова откритие“, рече Натан Пенел од Фондацијата Кливленд Клиника на прес-конференција.
„Почнавме да влегуваме во ерата на персонализирана терапија за пациенти во рана фаза“, рече Пенел, која не беше вклучена во испитувањата, и истакна дека „треба цврсто да ја затвориме вратата за неперсонализиран третман за сите луѓе со не -ситноклеточен карцином на белите дробови“.
„Осимертиниб“ веќе е одобрен во десетици земји за различни индикации, а околу 700.000 луѓе веќе го добиле, се вели во соопштението за печатот на АстраЗенека. Хербст ја истакна потребата од скрининг на пациентите за да се открие дали имаат мутација на EGFR. Во спротивно, рече тој, „не можеме да го користиме овој нов третман“.
Осимертиниб, кој го таргетира рецепторот, предизвикува несакани ефекти кои вклучуваат тежок замор, осип на кожата или дијареа.
TRT Balkan