Портпаролот на Кремљ, Дмитриј Песков, не е виден во јавноста од пред речиси три недели, кога за последен пат изјави дека претседателските избори во Русија „навистина не биле демократски“ и предвидуваше 90 отсто победа на Владимир Путин следната година.
„Нашите претседателски избори всушност не се демократија, тоа е скапа бирократија“, изјави Дмитриј Песков за New York Times (NYT) во напис од 6. август и додаде: „Господинот Владимир Путин ќе биде реизбран следната година со повеќе од 90 отсто од гласовите“.
Претседателските избори во Русија во 2024 година треба да се одржат на 17. март. Се очекува Владимир Путин наскоро да ја објави својата кандидатура за шести претседателски мандат. Според уставните измени направени пред војната во Украина, Владимир Путин би можел да остане на власт до 2036 година.
Руските и украинските канали на социјалната мрежа Телеграм многу брзо забележаа дека Димитриј Песков по оваа изјава не одржа ниту еден брифинг за новинарите и не ги коментираше за медиумите последните настани во Русија. Неговиот последен брифинг беше на 4. август, два дена пред неговите коментари да бидат објавени од NYT, објави Newsweek.
На денот на објавувањето, државните медиуми ја цитираа изјавата на Димитриј Песков дека неговите изјави биле погрешно протолкувани и погрешно претставени.
„Авторот на статијата ги толкуваше моите зборови на апсолутно погрешен начин“, изјави Димитриј Песков за државната медиумска агенција ТАСС, додавајќи дека се сретнал и разговарал со авторот на извештајот и одговорил на прашање за претстојните претседателски избори.
„А одговорот беше следниов: Нивото на консолидација околу претседателот е апсолутно без преседан и сега може да се каже дека ако се кандидира за претседател, ќе биде реизбран со големо мнозинство на изборите“, појаснил Димитриј Песков.
Димитриј Песков за влијателниот американски весник изјавил дека – „претседателот инсистирал изборите да се организираат без грешки и дека тоа го бара демократијата“.
Тој, исто така, за руската информативна веб-страница RBC изјавил дека – „иако изборите се услов за демократијата и самиот Владимир Путин одлучил да ги одржи, теоретски е можно да не се одржат“.
„Затоа што веќе е очигледно дека Владимир Путин ќе биде избран“, рекол тој, нагласувајќи дека неговата изјава е – „апсолутно мое лично мислење“.
Во меѓувреме, каналот на социјалната мрежа Телеграм во сопственост на руската ТВ водителка Ксенија Собчак тврди дека Димитриј Песков моментално е на одмор.
„Смирете се. Димитриј Песков е на одмор. Тој кажа дека ќе се врати за два дена“, се вели во објавата на каналот во понеделникот.