Во неделата, Казахстан го приреди најголемото изненадување досега во квалификациите за ЕУРО 2024. Тие губеа со 0:2 од репрезентацијата на Данска на домашен терен во Астана, но следеше сосема неочекуван пресврт, „аутсајдерите“ победија со 3:2 и стигнаа до првите бодови во групата Х.
Расмус Винтер Хојлунд двапати ја погоди мрежата во првото полувреме (21., 35.) и се чинеше дека тоа ќе биде лесна задача за Данците. Водеа до 73. минута, а потоа од белата точка прецизен беше Бактијар Зајнутдинов. Надежта брзо се претвори во апсолутно воодушевување, бидејќи за само три минути домашните остварија пресврт.
Најпрвин Аскат Тагиберген погоди во 86. минута, а Абат Аимбетов во 89. за сензационален резултат во Астана. На крајот од натпреварот тој заработи втор жолт картон, односно исклучување, но веројатно нема да зажали премногу.
Данска е втора на табелата од групата Х со три бода, колку што има и Северна Ирска со првото место. Казахстан е четврти со ист број бодови, а Словенија е трета (три бода) со натпревар помалку. Финска и Сан Марино се на дното без бодови.