Одржувањето диета знае да биде тешка „работа“, затоа често, брзо и лесно се откажуваме од неа. На долг рок, многу попаметно е да се сменат навиките на животниот стил, барем некои од нив.
Вишокот тежина, или дебелината, може да оптоварува и психички и физички. Тоа може да ја намали вашата самодоверба и да го зголеми ризикот од хронични состојби како што се дијабетес тип 2 или кардиоваскуларни болести. Дури и ако успеете да изгубите тежина со диета, изгубените килограми често се враќаат кога ќе се вратите на старите навики. „Одржливото“ слабеење бара нешто покорисно од диетата.
Темелно џвакајте ја храната
На вашиот мозок му треба време да ги обработи информациите дека сте јаделе доволно храна, а студиите покажуваат дека бавното џвакање го намалува внесот на храна и ја зголемува ситоста. Од друга страна, оброк кој се јаде набрзина има негативно влијание на линијата. Започнете со броење на залак додека не стекнете навика да џвакате побавно.
Користете помали чинии
Големите чинии често значат дека ќе истурете и изедете повеќе храна отколку што ви треба. Кога користите помали чинии, порциите изгледаат поголеми, но во реалноста јадете помалку . Користете големи чинии за нискокалорична храна и помали за висококалорична храна.
Зголемете го внесот на протеини
Протеините играат голема улога во процесот на слабеење. Тие помагаат да се чувствувате сити, го намалуваат гладот и внесот на калории. Истражувањата покажуваат дека богатиот протеински појадок го намалува чувството на глад подоцна во текот на денот. Некои извори на протеини вклучуваат јајца, риба, грчки јогурт, пилешки гради, леќа, киноа, бадеми…
Јадете повеќе домашно зготвена храна
Готвењето дома (и носењето на овие оброци на работа) ви помага да вклучите хранливо густа храна и да избегнете брзи, нездрави опции. Луѓето кои јадат повеќе домашно зготвена храна имаат тенденција да добиваат помалку килограми од оние кои често јадат надвор.
Храна богата со растителни влакна
Храната богата со диетални влакна помага да се чувствувате сити. Влакната се претвораат во гел кога ќе дојдат во контакт со вода, го забавуваат празнењето на желудникот и ја зголемуваат апсорпцијата на хранливите материи. Некои од храната богата со влакна вклучуваат грав, овесна каша, кељ, портокали, аспарагус, семе од лен…
Хидрирајте се
Обичната вода може да го намали внесот на храна и да помогне во губење на тежината, особено ако ја пиете пред оброк. Оваа навика ја намалува количината на внесена храна, без големо влијание врз чувството на ситост.
Избегнувајте го екранот додека јадете
Обрнувањето внимание и концентрација додека јадете може да ви помогне да внесете помалку калории. Луѓето кои гледаат телевизија или користат електронски уреди додека јадат, губат сметка за тоа колку јаделе, што доведува до прејадување. Истражувањата покажуваат дека луѓето кои се расеани додека јадат, внесуваат 10 отсто повеќе калории.
Квалитетен сон и помалку стрес
Спиењето и стресот имаат големо влијание врз апетитот и тежината, бидејќи го зголемуваат нивото на кортизол, што доведува до поголема глад и желба за висококалорична храна . Хроничниот недостаток на сон го зголемува ризикот од дијабетес тип 2 и дебелина.
Избегнувајте засладени пијалоци
Зашеќерените пијалоци како газираните пијалоци го зголемуваат ризикот од срцеви заболувања и дијабетес тип 2 и, како што знаете, тие се полни со шеќер. Наместо тоа, изберете нискокалорични пијалоци како што се вода, лесно засладено кафе и зелен чај.