Кинеската влада се насочува кон емоција што стана премногу честа појава на интернет и социјалните медиуми во земјата, а тоа е очајот.
Оваа недела, Кинеската администрација за сајбер простор започна двомесечна кампања за справување со објавите на социјалните мрежи кои „претерано ги преувеличуваат негативните и песимистичките чувства“. Целта, според властите, е да се „корегираат негативните емоции“ и „да се создаде поцивилизирана и рационална онлајн средина“.
Наративи како што се „учењето е бескорисно“ и „напорната работа е бескорисна“ се таргетирани, како и приказни што промовираат „замор од светот“.
Кина се соочува со економско забавување по кризата со недвижностите, високата невработеност кај младите и жестоката конкуренција за прием на колеџ и работа – сето тоа доведе до чувство на разочарување кај помладата генерација.
„Младите луѓе во Кина имаат сериозни прашања за нивните идни перспективи и мора да се соочат со фактот дека нивното постоење е многу веројатно да биде полошо од она на генерацијата на нивните родители“, изјави за Би-Би-Си Симон Сиханг Луо, доцент по општествени науки на Технолошкиот универзитет Нанјанг во Сингапур.
И загриженоста на Пекинг поради растечката фрустрација се покажа во бран санкции што ги погодија влијателните личности и платформите на социјалните медиуми во земјата.
Минатата недела, познатиот креатор на содржини Ху Ченфенг ги отстрани сите објави од своите социјални мрежи. Никој не знае зошто, бидејќи кинеските власти не дадоа објаснување. Но, се верува дека тоа било одговор на вирален коментар што тој неодамна го објави, класифицирајќи ги луѓето и предметите како „Apple“ или „Android“ – второто се користи за да се опишат работи инфериорни во однос на првите.
„Тоа е вашата типична Андроид логика, Андроид човек, Андроид квалификација“, рече тој за време на преносот во живо, кој оттогаш е широко споделуван онлајн.
Додека многу кинески корисници на социјалните медиуми брзо ја прифатија шегата, други го обвинија Ху за сеење социјална поделба.
Ваквите очигледни шеги за нееднаквоста се чини дека станаа деликатна област бидејќи ги зајакнуваат поделбите на кои Кинеската комунистичка партија не би сакала луѓето да се задржуваат.
Цензурата не е ништо ново на кинескиот интернет. Сè што сугерира критика на Партијата, нејзините лидери или допира до контроверзни теми што имаат политички импликации брзо исчезнува, пишува Би-Би-Си.
Она што е невообичаено во врска со оваа кампања против песимизмот е тоа што се чини дека е насочена кон низа онлајн однесувања што би можеле да создадат или да придонесат за чувства на негативност.
Жанг Сјуефенг, добро познат онлајн тутор познат по својата жестока реторика за образованието и социјалните прашања, предизвика контроверзии претходно овој месец кога вети дека ќе донира најмалку 100 милиони кинески јуани (14 милиони долари) доколку Пекинг одлучи да го нападне Тајван. Но, дури оваа недела стана цел на кинеска цензура.
Неговите профили на социјалните мрежи, кои имаат милиони следбеници, се блокирани за да добијат нови следбеници, објавија локалните медиуми во среда.
Сепак, не станува збор само за поединци. Кина сака платформите на социјалните медиуми да играат улога во масовното чистење на интернетот.
Овој месец, Администрацијата за сајбер простор соопшти дека ќе изрече „строги казни“ против апликациите на социјалните медиуми Сјаохонгшу, Куаишоу и Веибо поради тоа што не успеале да ја ограничат „негативната“ содржина, како што се „сензационализирачки лични вести за познати личности“ и други „тривијални информации“.