Градоначалникот на Киев Виталиј Кличко верува дека украинскиот претседател Володимир Зеленски ќе плати за своите грешки.
Тој во интервју за швајцарскиот портал „20 Minuten“ вели дека не е изненаден од падот на популарноста на Зеленски.
– Луѓето гледаат кој е ефикасен, а кој не. Имаше и има многу очекувања. Зеленски плаќа за грешките што ги направи… Имаше премногу информации кои беа невистинити – оцени Кличко.
Тој, исто така, се прашуваше дали Украина ќе продолжи да постои.
На прашањето на порталот дали Кличко има политички амбиции во врска со функцијата претседател на Украина, градоначалникот на Киев изјавил дека во овој момент „би било глупаво“ да се размислува за такво нешто.
– Денеска се работи само за тоа дали Украина воопшто ќе продолжи да постои – истакна Кличко.
Градоначалникот на Киев се согласи и со зборовите на врховниот командант на вооружените сили на Украина Валериј Залужни дека Киев е во ќорсокак на фронтот.
– Тој (Залужни) ја кажа вистината. Понекогаш луѓето не сакаат да ја слушнат вистината. Но, на крајот тој ја сноси одговорноста. Тој ја објасни и оправда моменталната состојба. Се разбира, можеме во еуфорија да ги лажеме нашите луѓе и нашите партнери. Но, тоа не може да се направи засекогаш. Некои наши политичари го критикуваа Залужни за неговите јасни зборови, но залудно. Јас сум на негова страна – изјави Кличко.
Претходно, во интервју за магазинот „Економист“, Залужни призна дека Украина е во ќорсокак во конфликтот и рече дека „најверојатно нема да има длабок и убав пробив“. Според него, според „учебниците на НАТО“, вооружените сили на Украина веќе требало да „војуваат“ на Крим.
Подоцна, на заедничката прес-конференција со претседателката на Европската комисија, Урсула фон дер Лајен, Зеленски се правдаше дека „не се во ќор-сокак“.