Преговорите со банките за условите под кои бизнис секторот ќе може да искористи 250 милиони евра од унгарскиот кредит продолжуваат викендов и по постигнатиот договор за рокот на отплата, Владата очекува резултат со најниска можна каматна стапка за ризикот кредит за стопанството.
По одвоените средби на Министерството за финансии со банките во изминатите денови, како и вчерашниот заеднички состанок на банките, има нов став од банкарскиот сектор, додека премиерот Христијан Мицкоски се надева дека деновиве ќе има уште една став.
„Сè уште се преговара, не можам да ви кажам колку бараат бидејќи тоа беше став, по денешната средба имаме нов став, се надевам дека деновиве ќе имаме поинаков став. Преговорите сè уште траат, нема да завршат денеска, најверојатно ќе продолжат во текот на викендот. Ние како Влада сакаме најниска камата за компаниите. Тоа е од интерес за компаниите, не за нас. Банките почнаа од 3,25 отсто, сега се приближуваме до нула, ќе видиме до каде ќе одиме“, рече Мицкоски, одговарајќи на новинарски прашања по отворањето на македонската вечер во рамки на „Отворено балканско лето визија“ во Белград.
Бараат, како што истакна, нула проценти бидејќи тоа ќе биде каматата за бизнисот. Сакаме бизнисот да добие многу помала камата, рековме дека овие 3,25 проценти ќе ги платиме ние како држава. Можеби финансиската состојба на пазарите ќе биде таква што по две-три години ќе издадеме еврообврзница со камата од 1 или 1,5 отсто, па земаме, па го враќаме кредитот порано, ова е наша одлука како Влада. Сега преговараме со банките за каматата што ќе ја плаќаат фирмите, односно бизнисот, стопанството. Нула ни одговара, не плаќаат, земаат пари, инвестираат во нивниот бизнис, па отвораат нови работни места итн…, рече Мицкоски.
Министерката за финансии, Гордана Димитриеска Кочоска, претходно информираше дека се очекува конечен одговор од банките за каматата која ќе биде помала од 3,25 отсто, додека рокот остана и голем дел од банките рекоа дека немаат проблем давање до три години грејс период и до 15 години отплата.
„Што се однесува до каматната стапка, секој од нив имаше свои предлози. Побарав денеска да се договорат и да дадат конечен предлог кој ќе биде помал од 3,25 проценти“, рече вчера Димитриеска Кочоска, одговарајќи на новинарски прашања.
Како точно компаниите ќе им платат на банките, како што рече Кочоска, банките ќе кажат кога конечно ќе ги стават средствата. „Секоја компанија ќе може да оди во банка каде сака и доколку биде одобрена, тогаш Банката за развој ќе префрли пари на таа банка“, рече министерот за финансии.
Бизнис секторот во неколку случаи изјави дека очекува Владата што поскоро да ги договори условите за унгарскиот заем кај деловните банки.
Унгарскиот заем е вреден половина милијарда евра. Половина од парите се наменети за општините за реализација на капитални проекти, додека половина за бизнис секторот. По изгласувањето на Законот за кредити во Собранието на 17 септември, на 8 октомври во Будимпешта, министерот за финансии го потпиша договорот, по што почнаа преговорите за условите за пласирање средства за стопанството преку деловните банки. Заемот е со каматна стапка од 3,25 отсто, три години грејс период и 12 години рок на отплата.