Некои африкански лидери денес пристигнаа во Русија на дводневен самит во Санкт Петербург со претседателот Владимир Путин, во време кога Кремљ бара повеќе сојузници во екот на борбите во Украина.
Владимир Путин денеска одвоено се сретна со етиопскиот премиер Абиј Ахмед и изјави дека Русија тројно ќе го зголеми бројот на студенти од Етиопија и ќе ги покрие трошоците за нивното образование.
Подоцна во текот на денот, Владимир Путин треба да има одвоена средба со египетскиот претседател Абдел Фатах ел Сиси.
Ова е втор руско-африкански самит од 2019 година, при што бројот на шефови на држави е намален од 43 на 17 поради, како што Кремљ го опиша, „тежок притисок на Западот врз африканските држави“.
Советникот на Владимир Путин за надворешни работи, Јуриј Ушаков, кажа дека на самитот ќе присуствуваат само 17 претседатели на држави, но оти 32 други африкански земји ќе бидат претставени од високи владини претставници или амбасадори.
Самитот следи по повлекувањето на Русија од договорот за жито што беше од витално значење за многу африкански земји, потег што предизвика остра осуда ширум светот и иницира нови закани за глобалната безбедност на храната.
Владимир Путин повеќе пати вети дека Русија ќе им понуди бесплатно жито на сиромашните африкански земји по завршувањето на договорот за жито.