Украина го објави првиот значаен напредок на бојното поле во последните шест месеци во понеделникот, при што претседателот Володимир Зеленски се врати од Лондон во Киев со ветување за нови беспилотни летала со долг дострел за контраофанзива против Русија.
„Напредокот на нашите војници во насока на Бахмут е првиот успех на офанзивните дејства во одбраната на оваа област“, изјави генерал-полковникот Олександр Сирски, командант на копнените сили, преку објава на социјалната мрежа Телеграм.
„Последниве денови се покажа дека можеме да го унапредиме и уништиме непријателот и во овие екстремно тешки услови. Се бориме со помалку ресурси од непријателот, а во исто време можеме да ги уништиме неговите планови“, се додава во изјавата на Олександр Сирски.
Битката за малиот источен град во Украина се претвори во најдолгата и најкрвавата војна и има посебно значење за Русија.
Украина од почетокот на оваа година подготвува контраофанзива со стотици нови тенкови и оклопни возила од запад, со цел повторно да заземе и поврати голем дел од анектираната украинска територија.
Володимир Зеленски се сретна со британскиот премиер Риши Сунак во понеделникот во Лондон, последната станица од турнејата во која тој веќе ги посети Рим, Берлин и Париз во изминатите три дена. Тој се враќа во Киев со ветувања за нови испораки на оружје.
Владата на Риши Сунак најави дека наскоро ќе започне со обука на украински пилоти за летање со борбени авиони, но нема да ги испорача авионите на Украина бидејќи Киев сака американски F-16 кои не ги користат британските воздухопловни сили.
„Се враќаме дома со нова воена помош. Понови и помоќни оружја за фронтот, поголема заштита за нашиот народ. Поголема политичка поддршка...“ кажа Володимир Зеленски во видео обраќањето од возот на враќање за Киев.
„Велика Британија ќе остане цврсто во својата одбранбена поддршка за Украина и нејзиниот народ… важно е и Кремљ да знае дека не заминуваме. Ние сме тука долгорочно“, нагласи во својата изјава британскиот премиер Риши Сунак.
Кремљ на ова одговори дека не верува дека дополнителната британска воена опрема ќе го промени текот на конфликтот.