Косовскиот премиер во технички мандат, Албин Курти, одбивањето на опозицијата во вторникот да гласа за конституирање на Собранието на Косово го нарече „обид да се остави куќата без домаќин“.
Тој ги обвини членовите на опозициските партии – ДПК, ДСК, АБК – како и на малцинската Српска листа дека „не гласале за верификација на нивните мандати како пратеници“.
„Оние кои не се согласија формално да ги преземат пратеничките мандати, сега бараат од мене формално да престанам да бидам премиер“, рече Курти.
Курти на седницата на Владата во технички мандат изјави дека владиниот кабинет поднел оставка и сега функционира во технички мандат, додавајќи дека „Косовскиот закон јасно го предвидува тоа“.
„Нашите овластувања се ограничени, но не може да има прекин на работата. Државата не може да остане без извршната власт. Владата не може да биде спречена да работи“, рече Курти.
Тој потсети на примерите на поранешните премиери Хашим Тачи и Рамуш Харадинај, кои останаа на функцијата и по оставката:
„Го имаме и примерот на поранешниот премиер Авдулах Хоти, кој остана на функцијата до формирањето на владата „Курти 2“ во март 2021 година, иако неговата влада беше прогласена за неуставна во декември 2020 година“.
Тој изјави дека само од владата на Самоопределување се бара веднаш да ги напушти канцелариите.
Според Курти, владиниот кабинет во технички мандат всушност поднел оставка на 23 март, кога завршил редовниот четиригодишен мандат.
„Од тој ден до изборот на нова влада до деветтото свикување на Собранието на Косово, нашата Влада ги извршува сите надлежности што и припаѓаат на извршната власт, во согласност со важечки закони“, рече тој.
Собранието на Косово во вторник ја прекина конститутивната седница бидејќи немало доволно гласови за извештаите на мандатно-имунитетната комисија, а опозицијата тврди дека членовите на владата на Курти и тој не ги поднеле навреме оставките.
На изборите на 9 февруари движењето Самоопределување на Курти освои 48 мандати.
Демократската партија на Косово (ПДК) на Мемли Красниќи освои 24 пратенички места, додека Демократската лига на Косово (ЛДК) на Лумир Абдиџику освои 20. Коалицијата на Алијансата за иднината на Косово (ААК) на поранешниот премиер Рамуш Харадинај освои осум места.
Девет од десет места во парламентот за српското малцинство освои Српската листа, која е поддржана од официјален Белград.