Тони Адамс изјави дека Микел Артета мора да му ја одземе капитенската лента на Мартин Одегард и да му ја даде на Деклан Рајс ако Арсенал сака да ја освои Премиер лигата. Норвешкиот играч од средниот ред беше назначен за капитен на Арсенал пред сезоната 2022/23, станувајќи првиот што ја презеде улогата трајно откако на Пјер-Емерик Обамејанг му беше одземена капитенската лента.
„Рајс треба да биде капитен“
Ерата на Одегард како капитен донесе добри резултати, бидејќи Арсенал редовно беше блиску до освојување на титулата во последните три сезони. Но, Адамс, поранешниот долгогодишен капитен на „топџиите“, верува дека е време за промена.
„Артета има многу важна одлука оваа година и не мислам дека сè уште ја донел. Треба да го назначи Деклан Рајс за капитен. Деклан е капитен по мој вкус и можеби тоа би му ослободило на Одегард да игра со поголема слобода“, рече Адамс.
„Менаџерот мора да му ја предаде капитенската лента на некој што го одразува него, кој го претставува клубот и кој може да го однесе на следното ниво.“ Адамс верува дека одлуката би можела да биде клучна за Арсенал конечно да ја освои Премиер лигата по 20 години.
„Оваа година тој има шанса да стане победник. Ако сакате да ја освоите титулата, мора да бидете како Клоп или Фергусон. Мора да водите со пример, мора да бидете победник и тоа мора да се види кај вашиот капитен.“
„Артета, направи го тоа“
„Го гледам Деклан Рајс како капитен и му велам на Артета: „Ајде, направи го тој чекор. Време е да станеш победнички менаџер, бидејќи со Одегорд како капитен нема да ја освоиш лигата“. Имаш играч кој ќе игра на секој натпревар, кој ќе привлече други да дојдат и да помогнат во изградбата на тим кој може да ја освои титулата. Рајс може да го направи тоа, Одегорд не може. Артета, направи го капитен“, рече Адамс.
Артета засега го задржува Одегард, но тој не се плашеше да прави промени на други места во тимот. Арсенал потроши речиси 200 милиони евра ова лето, а Мартин Зубименди, Виктор Ѓекереш и Нони Мадуеке се меѓу најголемите засилувања. „Топџиите“ ја отвораат новата сезона во Премиер лигата на „Олд Трафорд“ во недела против Манчестер Јунајтед.