Белорускиот претседател Александар Лукашенко во интервју за списанието „Тајм“ изјави дека Русија никогаш не побарала од Белорусија директно да се приклучи во војната против Украина. Тој верува дека вклучувањето на Белорусија во активни борби би имало многу политички и воени последици.
„Русија целосно разбира, а ние разбираме уште повеќе, дека ако отворено се приклучиме на оваа војна, тоа ќе создаде повеќе проблеми. Русија знае колку тешко би ни било, особено затоа што нема да се бориме само против Украинци. Ова би предизвикало распоредување на силите на НАТО во Украина“, рече Лукашенко.
Тој тврди дека голем број странски војници – Германци, Французи, Британци и други – би пристигнале во Украина под маската на волонтери.
„Тука би морале да се бориме против силите на НАТО. Целосно сме свесни за тоа. Покрај тоа, ракети би биле лансирани кон Белорусија. Таа е многу блиску. Ние го разбираме тоа, а го разбираат и Русите“, рече Лукашенко.
Тој неодамна ја повика ЕУ да се откаже од конфронтацијата со Русија.
Тој додаде дека евентуалното вклучување на Белорусија во војната дури и не е дискутирано со руското раководство.
„Патем, поранешниот директор на ЦИА, г-дин Бернс, дојде да нè посети. Му реков директно: „Нема да се бориме ниту да ја преминеме границата, но тука им помагаме на Русите“. Неговото главно прашање беше дали Белорусија ќе биде вовлечена во војната, дали ние ќе ја преминеме границата и така натаму. Му реков: „Види, ние дури и не сме имале таков разговор со Русија“, рече Лукашенко.
Неодамна, Лукашенко повторно ја повика Европската унија да се откаже од конфронтацијата со Русија.