Метеорит тежок 240 килограми, за кој се проценува дека е стар околу 4,5 милијарди години, беше продаден денес на аукција во Холандија за 1,7 милиони евра, објавија холандските медиуми. Станува збор за најтешкиот и најголемиот железен метеорит што некогаш бил понуден на аукција, објавува веб-страницата Vrt.
Парче од метеоритот Гивеон се покажа како вистински спасител за опсерваторијата Меркур во Дордрехт. На опсерваторијата ѝ се потребни средства за да остане отворена, па затоа организираше аукција на железниот метеорит. Фрагментот тежок 240 килограми беше продаден попладнево за 1,7 милиони евра.
Се состои главно од железо и никел и припаѓа на релативно редок вид метеорит.
Метеоритот беше продаден по многу повисока цена од очекуваната, која беше проценета помеѓу 800.000 и 1 милион евра.
Ова небесно тело се формирало пред околу 4,5 милијарди години во астероидниот појас помеѓу Марс и Јупитер.
Астероидот, од кој дел бил метеорит, се распаднал, најверојатно, за време на некој судир со друго тело во вселената.
Еден од неговите фрагменти, масивна вселенска карпа со тежина од 26.000 килограми, исто така се распаднал и паднал на Земјата пред 10 до 30.000 години. На територијата на Намибија, во близина на селото Гибеон, паднале стотици метеорити, а првите камења биле пронајдени во 1836 година.
Досега, во таа област се пронајдени вкупно 100 делови од метеоритот наречен Гивеон, потсети страницата.
Опсерваторијата „Меркур“ во Дордрехт купи голем фрагмент од метеорит тежок 240 килограми во 2004 година, но сега одлучи да го продаде и да ги искористи средствата за изградба на нов планетариум.
Минатиот месец, на аукција во Њујорк, метеорит од Марс, тежок 25 килограми, беше продаден за над пет милиони долари, што го прави најтешкиот камен од таа планета некогаш пронајден на Земјата.