Министерот за здравство Фатмир Меџити во говорот на „Летен клик“ на ТВ21 за новиот Клинички центар рече дека долгот кон италијанската компанија за прекршување на договорот за изградба на нов Клинички центар во Скопје од 8 милиони достигна 20 милиони евра.
„Од сите засегнати страни формиравме координативно тело во Владата. Избравме и американска адвокатска канцеларија, меѓу најдобрите. Мојата единствена цел беше сериозно да пристапам на сите проблеми и да не го оштетам државниот буџет. Како што знае јавноста, тоа беше проект од осум милиони евра, сега стигна арбитража во Лондон, судскиот процес стигна до 20 милиони, но може да достигне и повеќе“, рече Меџити.
Министерот рече дека овој нов Центар не го ветил лично како министер, туку дека е посветен на ова прашање.
„За новиот клинички центар многупати се разговараше. Јас не го ветив тоа. Тоа е многу голем предизвик. Јас и мојот тим во министерството пристапивме многу сериозно. За ова мора да имаме пошироко разбирање кое мора да го искажеме и во јавноста, да бидеме сериозни и транспарентни до крај дури и со опозицијата и еднаш засекогаш, како што сите знаеме, ова е капитален проект за државата. Мислам дека сите овие објективни проблеми еднаш засекогаш ќе се решат. Не дека зградите се стари, туку што имам поплака како доктор, но и сега работиме во таа насока како министер, всушност немало соодветно одржување. Секоја клиника има свој буџет кој го делегира Министерството за здравство“, рече Меџити.
Според министерот, за новиот клинички центар се заинтересирани неколку светски познати брендови, но во секој случај не треба да се избрзува.