„Група земји од Европската унија на границата со Украина сака да ја продолжи забраната за увоз на украински житарки“, изјави министерот за земјоделство на Унгарија, потврдувајќи го ставот на Варшава, која исто така бара помош од ЕУ за очекуваниот зголемен транзит на други пазари.
Во мај, ЕУ одобри забрана за увоз на пченица, пченка, канола и семки од сончоглед од Украина во Полска, Унгарија, Бугарија, Романија и Словачка, што ги намали цените на нивните пазари и го закочи празнењето на магацините за жито пред жетвата.
Во исто време, беа договорени транзитни коридори за да може украинските земјоделски производи да се пласираат на други пазари, вклучително и оние во другите членки на ЕУ.
Забраната за увоз треба да истече на 15. септември, но група земји кои граничат со Украина беа вознемирени од руската објава претходно оваа недела дека ја прекинува соработката според договорот со кој се гарантира испорака на жито и ѓубрива преку Црното Море до вторник.
Црноморската иницијатива ги вклучи Русија, Украина и Турција, а беше договорена во јули минатата година со посредство на Обединетите нации. Договорот беше продолжуван три пати, но Москва одби повторно да го продолжи, тврдејќи дека делот што се однесува на Русија не е исполнет.
Унгарскиот министер за земјоделство Иштван Наѓ пред денешната средба со колегите од Полска, Романија, Бугарија и Словачка изјави дека ќе побара од ЕУ да ја задржи забраната за увоз на пченица, пченка, семе од репка и сончоглед уште некое време.
„Одиме во Варшава за да ја зајакнеме соработката на петте земји и да потпишеме декларација или договор за да побараме од ЕУ да ја продолжи забраната по 15. септември“, изјавил унгарскиот министер на аеродромот пред да замине на состанокот.
„Жетвата на пченка и сончоглед во Унгарија сè уште не е започната, а во магацините се уште има украински житарки“, истакна Иштван Наѓ.
„Транзитот на украинските земјоделски производи треба да продолжи“, нагласи унгарскиот министер.
Полскиот министер за земјоделство Роберт Талус во вторникот изјави дека се подготвени да и помогнат на Украина со очекуваниот зголемен транзит на земјоделски производи по повлекувањето на Русија од иницијативата на Црното Море.
„Сепак, жетвата во Полска штотуку започна и транзитот нема веднаш да се зголеми“, предупреди министерот Роберт Талус.
Но, тоа ќе бара повеќе време, вели тој, а Европската унија мора да помогне во инфраструктурата.
„Мораме да ја принудиме ЕУ да помогне во подобрувањето на инфраструктурата“, нагласи тој.
Тој додаде дека на средбата со колегите од Унгарија, Романија, Бугарија и Словачка ќе се заложи за продолжување на ембаргото за увоз.
Поранешниот министер за земјоделство и претседателски советник Кшиштоф Ардановски за медиумската агенција Reuters изјави дека падот на договорот за Црното Море ќе биде катастрофа за Полска бидејќи логистиката не се подобрила во изминатите 12 месеци.
„Капацитетот на пристаништето остана ист, бројот на железнички и патни врски не е зголемен“, вели Кшиштоф Ардановски.
„Земјите кои граничат со Украина ќе бидат под притисок да ги отворат своите граници, но во исто време не слушам никаков нов логистички предлог од ЕК“, додаде тој.
Официјални претставници на ЕУ во вторникот повикаа на зголемена употреба на „солидарниот коридор“ во земјите кои граничат со Украина.