Премиерот Христијан Мицкоски денеска изјави дека владината коалиција е стабилна, додека јавниот спор меѓу пратеникот на ВМРО-ДПМЕ Антонио Милошоски и министерот за правда Игор Филков од коалициониот партнер ЗНАМ, според него, ќе застане, како што вели, на овие две лични позиции.
Мицкоски во одговор на новинарски прашања за тепачките меѓу Милошоски и Филков рече дека секој има право на лош ден.
„Владината коалиција е стабилна. Пратеникот Антонио Милошоски е член на Извршниот комитет на партијата, тој е дел од мојот најтесен круг. Соработката со Антонио Милошоски ја ценам на највисоко ниво, тој е додадена вредност и во пратеничката група и внатре во партијата Но, она што успеав да го заклучам и убеден сум дека сето тоа ќе застане на овие две лични позиции, дека секој има право на лош ден, па мислам дека тој лош ден завршува и за двајцата, рече Мицкоски, по пуштањето во употреба на фабриката „Магна Мехатроникс“ во Штип.
Запрашан дали има некаков проблем со коалицијата ВЛЕН каде министерот за здравство Арбен Таравари предводи едно од крилата на Алијансата за Албанците, тој рече дека такво чувство нема и дека имаат извонредна соработка.
„Не, немам такво чувство. Напротив, имаме извонредна соработка. Граѓаните треба да бидат сигурни дека Владата е стабилна, неофицијално повеќе од две третини и официјално оваа Влада е поддржана од 78 пратеници. Граѓаните, според она што го гледам од анкетите, даваат поддршка, има извонредно позитивно придвижување во насока дека Македонија е и понатаму да работиме.
Пратеникот на ВМРО-ДПМНЕ и потпретседател на Собранието, Антонио Милошоски вчера во телевизиско гостување рече дека министерот за правда Игор Филков има слаб придонес во областа со која раководи.
„Ова е мој личен став, не значи дека е став на партијата или на пратеничката група. Мислам дека министерот за правда има слаб настап во однос на заложбите што ги презеде за реформи во правосудството. Ова е мое мислење“, рече Милошоски.
Нагласи дека очекува досега во Собранието да бидат доставени Предлог-законот за судовите, Предлог-законот за судскиот буџет, Предлог-законот за јавнообвинителска служба и новиот Кривичен законик, барем во нацрт-форма.