Денес мора да донесеме одлука – да не дозволиме татковината да згасне во тишина, туку со сите сили да ја вратиме надежта, радоста и насмевката на детето во секој дом. Но, во исто време, мора да внесеме и надеж. Владата го гледа ова прашање како прашање на иднината на нацијата и затоа го поставува како еден од највисоките национални приоритети, нагласи премиерот Христијан Мицкоски на денешната централна церемонија по повод 34 години независност на земјата.
„Решени сме да изградиме систем што ќе ја охрабри помладата генерација да остане тука, да основа семејство и да верува во својата иднина во својата татковина. Ова значи континуирана работа на политики што ја зајакнуваат довербата во државата, што обезбедуваат стабилност и чувство на сигурност, што отвораат перспектива за секој млад човек, за да може да има достоинствен живот тука. Нашата визија е Македонија да стане земја во која детската насмевка ќе биде најголема вредност, земја во која родителите ќе знаат дека нивниот труд и љубов се ценети, земја во која иднината не се гледа во емиграцијата“, туку во создавањето, нагласи премиерот.
Затоа, како што рече, Владата останува посветена на инвестирање во луѓето, во семејствата, „во секое ново дете што ќе се роди“.
„Ова е суштината на нашата мисија – да обезбедиме Македонија да постои утре и задутре и во генерациите што доаѓаат“, подвлече Мицкоски.
Премиерот рече дека сè е залудно ако има сè помалку луѓе во земјата.
„Не можам да бидам смирен кога е познато и јасно дека во Македонија има се помалку и помалку луѓе. Можеме да дебатираме за патишта, раскрсници, даноци, плати и пензии. Но, бескорисно е ако имаме се помалку и помалку луѓе. Ако наталитетот е во рецесија. Бескорисно е да се градат патишта ако нема кој да вози по нив, да се градат училишта ако банките се празни или да се градат игралишта ако во нив нема бучава од деца. Сите наши напори и грижи се залудни ако по 70-100 години, нашиот народ ќе биде преполовен. Ние не сме голем народ, а прашањето за наталитетот е прашање на нашето постоење како народ и држава“, додаде премиерот.