Претседателот на Турција, Реџеп Таип Ердоган, изјави во понеделникот дека Европската унија треба да го отвори патот за Анкара да се приклучи на блокот пред турскиот парламент да ја одобри кандидатурата на Шведска за приклучување кон воената алијанса НАТО.
Говорејќи во Анкара, во пресрет на заминувањето на самитот на НАТО во Вилнус, Реџеп Таип Ердоган кажа дека приемот на Шведска зависи од спроведувањето на договорот постигнат минатото лето за време на самитот на НАТО во Мадрид, додавајќи дека никој не треба да очекува компромиси од Анкара. Минатата недела, Јенс Столтенберг, генералниот секретар на НАТО, кажа дека, што се однесува до него, Шведска го исполнила договорот.
Тој исто така кажа дека крајот на војната меѓу Украина и Русија ќе го олесни процесот на пристапување на Киев во НАТО.
Турција го блокираше пристапувањето на Шведска во НАТО, велејќи дека мора да стори повеќе за да ја одбие поддршката за курдските милитанти и другите групи кои Анкара ги гледа како закана за нејзината национална безбедност.
„Турција чека пред вратата на Европската унија повеќе од 50 години, а речиси сите земји членки на НАТО сега се членки на Европската унија. Сакам да испратам покана до оние земји кои ја оставаат Турција да чека пред вратата на Европската унија повеќе од 50 години. Отворете го патот за влез на Турција во ЕУ. Кога ќе го отворите патот, ние ќе го направиме истото со Шведска, како што го отворивме патот кон Финска“, порача Реџеп Таип Ердоган.
Турција официјално стана кандидат за полноправно членство во Европската унија уште во 1999 година, но нејзината кандидатура за членство е во застој поради демократското назадување на Анкара и споровите со членката на ЕУ, Кипар.
Шефот на шведската дипломатија Тобијас Билстром утринава изрази оптимизам дека Турција ќе се откаже од приговорите за членството на Шведска во НАТО, велејќи дека приемот на Шведска е прашање на време.
Тој вели дека очекува Турција на крајот да сигнализира дека Шведска може да се приклучи на алијансата, иако не може да каже дали тоа ќе се случи на самитот во Вилнус.
„Она на што сметаме е, се разбира, да дојдеме до точка каде што ќе добиеме од претседателот Реџеп Таип Ердоган нешто што би можеле да го наречете зелено светло… порака дека процесот на ратификација во турскиот парламент може да започне“, изјави претходно Тобијас Билстром.
Тобијас Билстром вели дека Шведска го исполнила својот дел од трипартитниот договор што Шведска, Финска и Турција го потпишаа на минатогодишниот самит на НАТО во Мадрид.