Најголемата поединечна студија за исхрана и рак на дебелото црево до сега откри како различната храна и пијалоци може значително да влијаат на ризикот од развој на болеста. Студијата, финансирана од Cancer Research UK, следела повеќе од 542.000 жени во текот на 16 години и ја анализирала врската помеѓу болеста и 97 различни производи и хранливи материи.
Резултатите покажале дека секојдневното консумирање на голема чаша млеко може да го намали ризикот од рак на дебелото црево за 17 отсто, што е поврзано со внесување на дополнителни 300 милиграми калциум дневно.
„Ова е најсеопфатната студија досега спроведена за поврзаноста помеѓу исхраната и ракот на дебелото црево и ја истакнува заштитната улога на калциумот во развојот на оваа болест“, рече главниот истражувач и епидемиолог, д-р. Керен Папиер, за Дејли Експрес.
Повеќе од половина од случаите на рак на дебелото црево може да се спречат
Ракот на дебелото црево е еден од најчестите форми на рак на глобално ниво. Според Светската здравствена организација (СЗО), приближно 1,93 милиони нови случаи на рак на дебелото црево биле дијагностицирани во 2020 година, што го прави трет најчест рак во светот. Според Софија Лоус, менаџер за здравствени информации во Cancer Research UK, повеќе од половина од случаите може да се спречат.
„Одржувањето здрава, урамнотежена исхрана, заедно со одржување на здрава телесна тежина и откажување од пушење, е еден од најдобрите начини да се намали ризикот од рак на дебелото црево“, истакна таа.
Покрај тоа, Лоус советува да се намали внесот на алкохол и црвено месо, како и да се зголеми потрошувачката на овошје, зеленчук и цели зрна.
„Со нетрпение очекуваме понатамошни истражувања кои ќе овозможат уште помалку луѓе да бидат погодени од оваа катастрофална болест“, заклучи Лоус.