Со зголемувањето на животниот век и наглото зголемување на популацијата на стари лица, зголемен е и бројот на постари болни од рак, што претставува сериозен проблем за јавното здравје. Светот мора да се подготви да прифати милиони нови пациенти и да ги прилагоди здравствените системи кои ќе можат да се справат со ситуацијата, пишува весникот The Guardian.
На годишниот состанок на Американското здружение за клиничка онкологија (ASCO) во Чикаго, директорот на центарот за третман на рак и специјалист по геријатриска онкологија, Ендрју Чепмен, рекол дека верува дека на глобално ниво не сме подготвени да се справиме со зголемената потреба за лекување.
„Познато е дека ракот е болест поврзана со стареењето, а постојат низа биолошки механизми кои објаснуваат зошто е тоа така. Меѓутоа, она што често се занемарува е дека целите, желбите и потребите на постарите се различни од оние на помладите пациенти. Понекогаш нивната болест се гледа нихилистички – ако сте постари, нема ни да се обидеме, што е ужасно“, рекол Ендрју Чепмен.
Тој објаснува дека постарите пациенти често претпочитаат третмани кои нема да ја нарушат нивната автономија и независност, наместо да се посветат на поефикасни третмани. Тие се грижат да можат да возат автомобил, да поминуваат време со своето семејство и да се занимаваат со хоби како градинарство или голф.
„Ако третирате лице со третман кој ќе му ја одземе независноста, можеби нема да се согласи со тоа. Затоа оваа ситуација се разликува од третманот на пример на 45-годишник кој сака да живее уште 40 години“, објаснува онкологот.
Џули Гралоу, извршен потпретседател на ASCO, смета дека здравствените системи треба да преземат итна акција за да не бидат изненадени од драматичното зголемување на бројот на заболени од рак и преоптоварувањето на системот.
„Се очекува до 2040 година бројот на заболени да се зголеми за 27,5 милиони, како и бројот на починати, кој ќе биде поголем за 16,3 милиони поради растот и стареењето на населението“, изјавил Џули Гралоу.
Дополнителни пречки на патот ќе бидат поврзани со работната сила, односно недостатокот на персонал и недостатокот на работници обучени за лекување на геријатриски случаи.
„Повеќето податоци од клиничките испитувања доаѓаат од помлади пациенти, треба да вклучиме постари пациенти во испитувањата за да можеме да ја разбереме штетноста и ефективноста на терапиите врз оваа популација“, објаснува Џули Гралоу.
Националниот институт за рак предвидува дека до 2040 година, речиси три четвртини од луѓето (73%) кои имаат рак ќе бидат постари од 65 години. Во Велика Британија, бројот на луѓе на кои им е дијагностициран рак ќе се зголеми за една третина, а повеќето од заболените ќе бидат на возраст од 70 или повеќе години.
Ќе се зголеми бројот на постари болни од рак на кои ќе им биде потребна мултидисциплинарна нега бидејќи боледуваат и од други болести, како што се кардиоваскуларни, срцеви или респираторни проблеми. Многу е веројатно дека пациентите ќе земаат лекови и за други болести, што го комплицира лекувањето на ракот, тврди Чарлс Свантон од Центарот за истражување на ракот во Обединетото Кралство.