Вулканот Таал во филипинската провинција Батангас забележа три помали ерупции и земјотреси во неделата, соопшти Институтот за вулканологија и сеизмологија.
Според експертите, областа околу вулканот, кој се наоѓа во истоименото езеро, не е безбедна, а нова ерупција на лава и чад може да се случи во секое време. Камерите ја снимиле ерупцијата директно во кратерот.
Првата ерупција се случила во 2:55 часот наутро, а следните две следеле во 8:13 часот наутро и 8:20 часот наутро по локално време. Во текот на 24 часа, институтот регистрирал вкупно девет вулкански земјотреси, вклучувајќи два што траеле и по 96 минути.
Облаците од пепел за време на ерупциите се искачија до висина од 2,1 километар. Дневните емисии на сулфур диоксид изнесуваа 436 тони, додека температурата на кратерот достигна 69,3 степени Целзиусови. Експертите, исто така, констатираа дека имало мало отекување на островот.
Вулканот моментално е на ниво на тревога 1, што укажува на абнормална состојба и можност за ненадејни експлозии на пареа и гасови. Влезот на островот Таал, особено во главната област на кратерот и зоната Даанг Кастил, е строго забранет.