Во Србија се зголемува бројот на деца кои боледуваат од голема кашлица или т.н. „100-дневна болест“.
Според официјалните податоци, најпогодена е возрасната група до 12 месеци, но засегнати се и зголемен број училишни деца на возраст од 10 до 14 години. Педијатарот д-р. Саша Милиќевиќ вели дека болеста главно ги напаѓа малите деца и бебињата, поради недоволно развиениот имунитет.
„Инаку, оваа болест се карактеризира со постојана и силна кашлица. Токму затоа ја разликуваме од обичните форми на кашлица, бидејќи кашлицата може да се појави со астма, алергии или настинки. Во овие случаи, тоа е заштитен и одбранбен механизам, но големата кашлица е дијагноза и болест позната по друго име – 100-дневна болест“, вели д-р. Саша Милиќевиќ, цитиран од Blic.rs.
„Можеме да препознаеме по тоа што децата имаат црвени очи, а фазата на вдишување и издишување им е тешка, што најмногу ги плаши родителите. Кога станува збор за мало дете, тоа може да биде опасно. Имено, поради таа интензивна кашлица, која доаѓа во рафали, може да дојде до краткотрајно губење на свеста“, објаснува д-р. Саша Милиќевиќ.
Докторот вели дека симптомите во почетната фаза се некарактеристични, поради што родителите можат да грешат при проценката на состојбата на детето.
„Се појавува треска, малаксаност, болки во грлото и кашлица. Денес секое трето дете ги има овие симптоми. Температурата понекогаш може да биде висока, а понекогаш и да ја нема. Во суштина, сето тоа личи на настинка, а потоа излегува дека друго дете имало голема кашлица и ја пренело“, тврди Саша Милиќевиќ.
Во текот на 2021 и 2022 година во Србија се регистрирани пет случаи, а само во октомври годинава имало дури 78 случаи на голема кашлица.
„Сите овие заразни болести имаат свој циклус. Некои се појавуваат две години, некои четири години, а понекогаш и немаме вистинско објаснување зошто се појавило нешто. Вакцината постои, но ритамот е нарушен бидејќи луѓето ја изгубиле довербата во вакцините. Ова не е вирус, туку бактериска болест“, заклучил Саша Милиќевиќ за соседните медиуми.