Американскиот претседател Доналд Трамп распоредува 2.000 припадници на Националната гарда во Лос Анџелес за справување со масовните немири предизвикани од рациите на имигрантите.
Калифорнискиот град вчера се соочи со втор ден немири, откако жителите на претежно латиноамериканскиот округ се судрија со агентите на федералната служба за имиграција и царина (ICE).
Солзавец и палки беа употребени за растерување на толпата во округот Парамаунт.
Дури 118 апсења беа извршени во Лос Анџелес оваа недела како резултат на операциите на ICE, вклучувајќи 44 во петокот. Гувернерот на Калифорнија, Гавин Њусом, ги осуди рациите како „брутални“.
Њусом вчера му се јавил на Трамп и разговарале околу 40 минути, изјави портпаролот на гувернерот за Си-Би-Ес њуз. Не се познати други детали од разговорот.
Парамаунт значително се смири, но судирите меѓу демонстрантите и полицијата продолжуваат да се случуваат.
Шерифите на округот Лос Анџелес користат солзавец на секои неколку минути обидувајќи се да ги растераат демонстрантите.
Демонстрантите велат дека мигрантите се затворени во локалните бизниси и се плашат да излезат.
Во соопштението за медиумите од Белата куќа се вели:
„Во последните денови, насилни толпи нападнаа службеници на ICE и федерални агенти за спроведување на законот кои спроведуваат основни операции за депортација во Лос Анџелес, Калифорнија.“
Поради ова, Трамп потпиша претседателски меморандум за распоредување на 2.000 припадници на Националната гарда за справување со, според Белата куќа, беззаконието што тлее.
Заменик-директорот на ФБИ, Ден Бонгино, исто така издаде предупредување до демонстрантите:
„Вие донесете хаос, а ние ќе донесеме лисици. Ќе преовлада законот и редот.“