Симптомите како затнат нос, главоболка и болки во грлото укажуваат на тоа дека се работи за обична настинка, но можат да бидат и знак за инфекција на синусите.
Настинката и синусните инфекции имаат многу слични симптоми, па затоа често се мешаат, за жал, не постои едноставен одговор за разлика помеѓу настинка и синусна инфекција. Само околу 2 до 6 проценти од обичните настинки се претвораат во вистинска бактериска инфекција на синусите.
Секоја година, околу 31 милион луѓе доживуваат синусни инфекции (синузитис), кои обично се предизвикани од бактерии или вируси кои растат во синусите, шуплините зад носот, очите, веѓите и јаготките.
Настинката може да доведе до инфекција на синусите
Најчесто, инфекциите на синусите се предизвикани од вируси, но причина може да бидат и бактериски инфекции. Бактериска или вирусна инфекција предизвикува отекување на слузницата на синусите и блокирање на малите отвори во синусите, попречувајќи го нивниот капацитет за одводнување. Заробената слуз им овозможува на бактериите да се размножуваат, предизвикувајќи болка и притисок во главата и лицето.
Настинките се благи вирусни инфекции на горниот респираторен тракт, а не се предизвикани од акумулација на бактерии и воспаление во синусите. Сепак, настинката може да доведе до инфекција на синусите.
Како да се направи разлика помеѓу настинка и инфекција на синусите?
Иако некои симптоми на настинка и инфекција на синусите може да бидат слични (затнат нос, болки во грлото и кашлица), постојат и разлики.
Бојата на назалниот исцедок може да помогне да се направи разлика помеѓу настинка и синузитис. Настинките обично предизвикуваат чист исцедок, додека бактериските инфекции доведуваат до зеленикава или жолтеникава слуз. Сепак, вирусите понекогаш можат да обојат и секрети, така што ова не е целосно сигурен тест.
Симптоми на настинка
Главната разлика помеѓу симптомите на настинка и инфекција на синусите е колку долго траат. Луѓето со настинка обично имаат течење на носот 2 до 3 дена, а потоа затнат нос уште 2 до 3 дена. Повеќето луѓе се опоравуваат во рок од 7-10 дена од симптомите.
Настинките предизвикуваат кивање, затнат нос, течење на носот, болки во грлото, кашлица.
Симптоми на синусна инфекција
Инфекцијата на синусите обично трае подолго од обичната настинка, од 3 до 8 недели. Треска, исто така, може да укаже на бактериска инфекција. Понекогаш тие одат со слаба треска, додека настинката обично не. Сепак, други вирусни инфекции (како што е грипот) може да предизвикаат треска.
Кај синусните инфекции има течење на носот, затнат нос, болка и притисок на лицето, главоболка, слуз што тече низ грлото, болки во грлото, кашлица и лош здив.
Третман на настинки и синузитис
За повеќето луѓе, постојат превентивни мерки кои можат да помогнат да се спречи инфекција на синусите или, доколку се појави, да се олеснат симптомите. Се препорачува одмор, пиење многу течности, вдишување пареа и наводнување на синусите со физиолошки спреј.
Бактериските инфекции на синусите можат да траат до 8 недели, а употребата на лекови го забрзува процесот на закрепнување. Сепак, околу 70 проценти од инфекциите на синусите поминуваат сами, а многу пациенти претпочитаат да ги остават да се развијат природно.
Меѓутоа, ако не се лекува, синузитисот може да предизвика трајно оштетување на синусите, а во многу ретки случаи може да доведе до менингитис. Доколку пациентите пропуштаат работа или други активности поради инфекции на синусите или ако симптомите често се повторуваат, треба да одат на лекар за евалуација, пренесува Health.