Владата, на вчерашната седница, ги направи првите чекори кон имплементација на Договорот со Велика Британија и веќе е формирано Координативно тело кое ќе го следи спроведувањето на Договорот меѓу Северна Македонија и Велика Британија, информираше вицепремиерот и министер за транспорт, Александар Николоски.
Како што е наведено во денешното соопштение од Министерството за транспорт, покрај вицепремиерот Николоски, членови на Координативното тело се и министрите за надворешни работи и надворешна трговија, за енергетика, минерални суровини и рударство, за дигитална трансформација и за здравство, како и директорот на Македонски железници – Инфраструктура, генералниот секретар на Владата и државниот обвинител, додека телото има право да покани и други гости по потреба, кои ќе го следат спроведувањето на Договорот меѓу Северна Македонија и Велика Британија.
Министерот Николоски додаде дека на вчерашната владина седница е направен првиот чекор за започнување на проектот за изградба на брзата железница во Коридорот 10, од границата со Грција до границата со Србија.
„Поточно, Владата, на предлог на Министерството за транспорт, донесе Одлука, со која го задолжува Министерството за финансии да обезбеди средства за реализација на овој проект, на меѓународниот финансиски пазар, преку отворена и транспарентна постапка. Се очекува должината на железницата да биде над 200 км, треба да биде двојна, со брзина до 160 км/ч, додека во товарниот сообраќај брзината треба да биде најмалку 120 км/ч, додека рокот за реализација треба да биде некаде околу 5 години. Очекуваме дека во текот на летните месеци ќе имаме поконкретни детали за финансирањето на проектот, а секако и да преминеме на фазата на избор на компанијата за имплементација, која ќе започне со работа на терен оваа есен. Ќе работиме на заеднички проект, каде што дизајнот и имплементацијата ќе ги врши истата компанија, а во најголем дел ќе се спроведува според правилата на FIDIC, или според таканаречениот жолт FIDIC или според таканаречениот среден FIDIC“, изјави вицепремиерот, наведено во соопштението.