Полуматурантите кои не успеаја да се запишат во средно образование на првото пријавување во јуни, денеска имаат нова шанса преку второто електронско пријавување за учебната 2025/2026 година. Потребната документација до избраните училишта ќе се доставува утре, додека конечната ранг-листа со запишани ученици ќе биде објавена в среда, на 2 јули, најдоцна до 12 часот.
Според податоците на Министерството за образование и наука (МОН), за второто пријавување има вкупно 16.034 слободни места во средните училишта. Од нив, 10.758 се за паралелки на македонски наставен јазик, 4.781 на албански, 474 на турски и 21 место на српски наставен јазик.
Најголем број од слободните места се за стручно образование – 12.307, додека за гимназиско образование остануваат 3.727 слободни места.
Во првиот уписен рок, кој се одржа од 14 до 17 јуни, се запишаа 13.712 ученици од вкупно 16.601 пријавени. Од нив, 10.172 ученици се запишани во паралелки на македонски наставен јазик, 3.248 на албански, 279 на турски и 13 ученици на српски наставен јазик.
Податоците потврдуваат дека интересот за стручно образование продолжува да биде значително поголем од оној за гимназиско. На првиот уписен рок, дури 9.469 ученици избраа стручно образование, наспроти 4.243 кои се запишаа во гимназии.
Конкурсот за упис веќе е затворен за дел од гимназиите, меѓу кои „Јосип Броз Тито“ во Битола и „Никола Карев“ во Скопје, како и за одредени сектори и квалификации во стручните училишта, каде што слободните места се пополнети уште во првиот рок.
За учениците кои нема да се запишат во овој јунски рок, следната можност е августовскиот уписен рок. Електронското пријавување ќе се спроведе на 21 август, кога истовремено ќе се доставува и потребната документација до училиштата. Резултатите од запишувањето ќе бидат објавени ден подоцна, на 22 август.