Воена база на САД во Ирак во саботата повторно била нападната со дрон, соопштија безбедносни извори во Ирак, но Пентагон соопшти дека не може да ја потврди оваа информација.
Ова е петти напад врз американски и странски сили во Ирак во последните четири дена, бидејќи вооружените групи блиски до Иран ги загрозуваат американските интереси поради поддршката на Вашингтон за Израел, на чија територија исламистичкото движење Хамас изврши напад без преседан на 7. октомври.
Немаше жртви во нападот во саботата, а групата наречена Исламски отпор во Ирак ја презеде одговорноста за него преку објава на социјалните мрежи од лица блиски до шиитските групи лојални на Иран.
„Дронот падна во базата ‘Аин ал Асад’, на запад од Ирак, каде што се стационирани американските и меѓународните антиџихадистички коалициски сили“, изјавил за AFP извор од ирачката Армија, кој сакал да остане анонимен.
Друг претставник на локалната безбедност зборувал за две беспилотни летала: првиот бил соборен, а вториот паднал поради технички дефект.
Сепак, Пентагон соопшти дека не знаел за инцидентот.
„Не добивме никаков оперативен извештај за да потврдиме дека нападот се случил во саботата“, изјавил претставник на Пентагон кој сакал да остане анонимен.
Базите „Аин ал Асад“ и „Ал Харир“ во северен Ирак и воениот камп во близина на аеродромот во Багдад се цел на пет напади од средата. Во овие бази се американски и коалициски војници.
Околу 2.500 американски војници и илјада војници од другите земји членки на коалицијата сега се стационирани во базите на ирачките сили.
Во последните денови, групите лојални на Иран, кои го поддржуваат Хамас и не ја признаваат државата Израел, им се закануваат на САД. Еден од нив, Хезболах, побара Американците да го „напуштат“ Ирак, во спротивно ќе го вкусат огнот на пеколот.
Хамас уби повеќе од 1.400 луѓе на израелска територија од 7. октомври, главно цивили кои беа покосени со куршуми, живи запалени или усмртени по тортурата на првиот ден од офанзивата на палестинското исламистичко движење од Појасот Газа, соопштија израелските власти.
Во Појасот Газа, речиси 4.400 Палестинци, главно цивили, загинаа во континуираното израелско бомбардирање.