Основното јавно обвинителство Кочани, по добивањето на официјалната документација за смртта на Александар Карадакоски, управител на дискотеката „Пулс“ од Кочани, ќе донесе наредба за запирање на истрагата против него, соопшти обвинителството откако претходно денеска министерот за здравство Арбен Таравари потврди дека жртвата се наоѓа во болницата „Карачади 6.”
„Со оглед на тоа што денешната 60-та жртва од катастрофалниот пожар во Кочани е лице кое и претходно било инволвирано во истражната постапка, во својство на управител на правното лице, Основното јавно обвинителство Кочани по добивање на официјалната документација за причините за смртта ќе донесе наредба за запирање на истражната постапка против него“, велат од Јавното обвинителство.
Стручниот колегиум на Јавното обвинителство денеска одржа состанок во проширен состав и со едноминутно молчење во знак на почит кон жртвите од трагедијата во дискотеката „Пулс“ во Кочани, на која беа презентирани досегашните дејствија, начинот и концептот на истрагата и професионалните аспекти на случајот кои обвинителите ги имаат предвид во текот на истрагата.
Во трагичниот пожар што ја зафати дискотеката „Пулс“ во Кочани на 16 март годинава животот го загубија 60 млади лица, а околу 200 се повредени.